मुक्त कमलरी विकास मञ्चसे गाउँपालिकाहे ज्ञापनपत्र
पहुरा समाचारदाता
बौनिया, ८ बैशाख । मुक्त कमलरीहुक्रे अपन समस्या समाधान ओ सम्बोधनके लाग गाउँपालिकाहे ज्ञापनपत्र बुझैले बटै । मुक्त कमलरी विकास मञ्च कैलाली, मुक्त कमलरी विकास मञ्च स्थानीय समितिसे टमान माग रख्टी बर्दगोरिया गाउँपालिकाहे बुधके रोज ज्ञापनपत्र बुझाइल हुइट ।
मुक्त कमलरीहुकनके चाहाना शिक्षा, सीप, रोजगार, जमिन सहितके पुनस्र्थापना, प्राविधिक शिक्षाके व्यवस्था करे पर्ना, लोकसेवा तयारी कक्षाके व्यवस्था हुई पर्ना, ३६ महिने सीप
मुलक तालिमके व्यवस्था करे पर्ना लगायतके १० बुदे मागसहित गाउँपालिका अध्यक्ष बलिराम डगौरा थारुहे ज्ञापनपत्र बुझाइल हुइट ।
ओस्टेक वेपत्ता कमलरीके खोजी तथा हत्या करल कमलरीहे न्याय डेहे पर्ना जोरदार माग उठाइल बा । ज्ञापनपत्र बुझ्टी गाउँपालिका अध्यक्ष चौधरी कमलरीहुकनके समस्या सम्बोधनके लाग अपने प्रतिबद्ध रहल बटैलै ।
उहाँ ओइनहे राज्यसे पैना शिक्षा, स्वास्थ्य, रोजगारी जैसिन सेवा सुविधा डेहुवइना प्रतिबद्धता समेत जनैलै । साथे कमलरीहुकनहे स्वावलम्बी बनैना तालिमके लाग बजेट छुट्यइना प्रतिबद्धता समेत जनैलै ।
मुक्त कमलरी विकास मञ्च कैलालीके आयोजनामे हुइल कार्यक्रममे गाउँपालिकाके टमान वडाके कमलरी तथा कमलरी परिवारके सदस्यके सहभागिता रहे ।
