जिप दुर्घटनामे १ के ज्यान गैल
बैतडी, १३ बैशाख । बैतडीमे बराती सवार जिप दुर्घटना होके १ जनहनके मृत्यु हुइल बा । दुर्घटनामे दुलहा दुल्हनीया सहित ११ जाने घाहिल हुइल बाटै । बैतडीके पाटन–खोड्पे सडक खण्ड अन्तर्गत हिरापुर कना स्थानमे जिप दुर्घटना होके दशरथचन्द नगरपालिका ९ के ५५ वर्षीय देवीलाल जोशीके मृत्यु हुइल हो ।
कञ्चनपुरके महेन्द्रनगरसे बरात लेके अइटी रहल सुदुरपश्चिम प्रदेशके ०१–००१ च ३७७ नम्बरके जिप सोम्मारके सकारे दुर्घटनामे परल हो । दशरथचन्द नगरपालिका ९ के चालक लक्ष्मीदत्त जोशीके अवस्था गम्भीर रहल जिल्ला प्रहरी कार्यालय बैतडीके प्रवक्ता प्रहरी निरीक्षक किशोर ऐरी जानकारी डेलै ।
उहाँ प्राथमिक स्वास्थ्य चौकी पाटनसे थप उपचारके लाग डडेल्धुरा अस्पताल रेफर करल उहाँ बटैलै । दशरथचन्द नगरपालिका ९ के शिवदत्त जोशी फेन गम्भीर घाहिल हुइल बाटै । ओहकान प्राथमिक स्वास्थ्य चौकी पाटनसे उपचार हुइटी रहल बा ।
दुर्घटनामे घाहिल हुइल दुल्हा दुल्हनीया सहित अन्यके फेन ओहै उपचार हुइटी रहल बटैलै । दुर्घटनाके कारण भर आभिन खुलल् नैहो ।
