धनगढी पोलिटेक्निक इन्स्टिच्यूटके भवन शिलान्यास

पहुरा समाचारदाता
धनगढी, १३ बैशाख । धनगढी उपमहानगरपालिकासे प्राविधिक शिक्षा तथा व्यावसायिक तालिम परिषद (सिटिईभिटी) संगके साझादारीममे संचालनमे नानल धनगढी पोलिटेक्निक इन्स्टिच्यूटके भवन शिलान्यास करल बा ।

धनगढी उपमहानगरपालिकाके नगरप्रमुख नृपबहादुर वड सोम्मार भवनके शिलान्यास करल हुइट । भवन निर्माणके ठेक्का जीके कन्स्ट्रक्सन धनगढीसे लेले बा । भवनके शिलान्यास करटी नगरप्रमुख वड यी क्षेत्रके बालबालिका न्यून शुल्कके गुणस्तरीय प्राविधिक शिक्षा पह्रे पैना कहिके धनगढी उपमहानगरपालिकासे अपनही बहुप्राविधिक शिक्षालय संचालनमे नानल बटैलै ।

भक्तपुरके ख्वाप ईन्जिनियरिङ्ग कलेजपाछे उपत्यका बाहेर अपनही प्राविधिक शिक्षालय संचालन कैना धनगढी उपमहानगरपालिका पहिल हो नगरप्रमुख वड कहलै,‘ यहाँ न्यून शुल्कमे अटोमोवाईल ईन्जिनियरिङ्ग डिप्लोमा तह ओ होटल म्यानेजमेन्ट डिप्लोमा तहके पठनपाठन हुइना करल हो । सिटिईभिटीके अटोमोवाईल ईन्जिनियरिङ्ग डिप्लोमा तह ओ होटल म्यानेजमेन्ट डिप्लोमातहके पठनपाठन करैना कर्णाली ओ सुदूरपश्चिम प्रदेशमे धनगढी पोलिटेक्निक इन्स्टिच्यूट केल रहल बताइल बा ।

धनगढी उपमहानगरपालिकाके उपप्रमुख सुशीला मिश्र भट्ट धनगढी पोलिटेक्निक इन्स्टिच्यूटमे न्यून शुल्कमे प्राविधिक शिक्षाके पठनपाठन हुइटी रहल बटैली । धनगढी पोलिटेक्निक इन्ीिटच्यूट अटोमोवाईल ईन्जिनियरिङ्ग डिप्लोमा तह ओ होटल म्यानेजमेन्ट डिप्लोमा तहकके अतिरिक्त छोट समयके निःशुल्क सीपमूलक तालिम संचालन करटी आइल बा उपप्रमुख भट्ट कहली, ‘हमार उद्देश्य दक्ष जनशक्ति उत्पादन कैना हो ।’

धनगढी पोलिटेक्निक इन्स्टिच्यूटमे अटोमोवाईल ईन्जिनियरिङ्ग तीन वर्षे डिप्लोमा तहके १ लाख ८० हजार ओ होटल म्यानेजमेन्ट तीन वर्षे डिप्लोमा तहके १ लाख ५३ हजारमे पढाई पुरा हुइना करठ । यिहे विषय अन्यत्र बढेबेर भारी खर्च हुइना करठ ।