हत्याके दोषीहे अनुसन्धानके दायरामे लन्ना माग

पहुरा समाचारदाता
धनगढी, २६ भदौ । कैलालीके धनगढी उपमहानगरपालिका–१७ स्थित उत्तरखैरेनी मुक्त कमैया शिविरके १० वर्षीय तनुज चौधरीके हत्या घटनामे संलग्न थप व्यक्तिहे अनुसन्धानके दायरामे लन्ना मृतकके आफन्त माग करले बटै ।
बालकके हत्या मिलेमतोमे हुइल जिकिर कैटी उहाँहुक्रे घटनामे संलग्न सक्कु जनहनहे कारबाहीके माग करल हुइट । पीडित पक्षसे शुकके धनगढीमे पत्रकार सम्मेलन कैके तनुजके हत्या गाउँके एक परिवारके मिलेमतोमे २५ वर्षीय खगेन्द्र कठायतसे करल जिकिर करले बटै । घटनामे गाउँके दिलखुश चौधरी, उहाँके गोसिनीया शुकनीदेवी ओ नाबालक छावाके संलग्नता रहल मृतकके बाबा निमराज चौधरी बटैलै । उहाँके अनुसार घटना हुइनासे आघे शुकनीदेवी ओ खगेन्द्रबिच फोनमे बातचित हुइटी रहे ।
चौधरी कहलै,“असार १० गते उहाँहुक्रे नै घरसे मोर छावाहे बोलाके मोयाँस्थित धान लगैटी रहल खेट्वामे लैजैना, वहाँसे साँझ खगेन्द्रके ठन छोर्नासे ओइनके संलग्नता पुष्टि हुइठ् ।”
पीडित पक्षके अनुसार धान लगैना ठाउँमे दिलखुश, खगेन्द्र ओ वहाँँ काम करुइया गेग्टा ओ दारु पियल रहिट । साँझ घर अइना बेलामे औरे फरक फरक डगरा लग्लेसे फेन खगेन्द्र, तनुज ओ दिलखुशके छावाहे सँगे घर फिर्ता पठाइल रहे । यद्यपि, १५ वर्षीय बालक जो मृतकके संघरिया फेन रहिट, उहाँ तनुजहे बन्वामे खगेन्द्रसंगे छोरके घर गैल पीडित पक्षके कहाइ रहल बा ।
तनुज घर नैआइलपाछे अभिभावक दिलखुश ओ खगेन्द्रके घरमे घरी घरी सोधपुछ करल रहिट । तीन दिनपाछे गाउँ लग्गे सामुदायिक बन्वामे ढुङ्गासे मारके वीभत्स हत्या करल अवस्थामे बालकके शव भेटल रहे । खगेन्द्र घटनाके बारेम दिलखुश ओ ओहकान गोसिनीयाहे पहिले नै जानकारी करासेकल रलेसे फेन उहाँहुक्रे घटना नुकैना, ढाकछोप कैना कार्य करल पीडितके आरोप रहल बा ।
मृतकके डाइ राधा छिमेकी परिवारके संलग्नतामे आपन छावाके हत्या हुइल कहटी सक्कु जनहनहे कारबाही कैना माग करली । “मोर छावा न्याय पाइ परल”, उहाँ कहली,“ओइनहे पक्राउ कैके तुरुन्त छानबिन प्रक्रिया आघे बह्रैना माग करटु ।”
धनगढी उपमहानगरपालिका ओ गौरीगङ्गा जोर्ना सिमानामे रहल कालिका सामुदायिक वनमे वीभत्स हत्या करल अवस्थामे तनुजके शव भेटल रहे । घटनामे संलग्न रहल आरोपमे प्रहरी दिलखुश, १५ वर्षीय बालक ओ खगेन्द्रका बाबा टेक कठायतसहित स्थानीय एक व्यक्तिहेसमेत सुरुमे पक्राउ करल रहे । यद्यपि, हत्यामे संलग्न रहल पुष्टि हुइ नैसेकलपाछे तीन दिनपाछे आरोपित छुटल रहिट । खगेन्द्र भर घटनापाछे फरार हुइल रहिट । भारततर्फ भग्टी रहल अवस्थामे उहाँहे पाछे प्रहरी पक्राउ करल रहे । हत्याके अभियुक्तहे पुर्पक्षके लाग जिल्ला प्रहरी कार्यालय साउनमे कारागार चलान करसेकल बा ।
मृतक बालकके बुडी महन्तादेवी चौधरी दिलखुशके परिवार आपन नटियाहे खगेन्द्रके हाठमे सम्पल कार्य करल ओरसे ओइनउपर कारबाही हुइ पर्ना माग करले बटी । “हम्रे न्याय पाइ परल”, उहाँ कहली । ओस्टके, स्थानीय भागीराम चौधरी घटना हुइनासे आघे उहाँहुक्रन बिच घरी घरी फोनमे बातचित हुइल ओरसे मिलेमतोमे घटना घटाइल जिकिर करल रही ।