कैलाली ओ कञ्चनपुरके सीमा नाकामे ठप कडाइ

किनमेलके लाग सीमावर्ती बजार जैना रोक

पहुरा समाचारदाता
धनगढी, १३ वैशाख । स्थानीय प्रशासनसे भारतसँग जोरल कैलाली ओ कञ्चनपुरके सीमा नाकामे ठप कडाइ कैना निर्णय करले बा ।

सोम्मार धनगढीमे बैठल अन्तरजिल्ला कोभिड–१९ संकट व्यवस्थापन केन्द्रके बैठकसे डेहल सुझावके आधारमे गौरीफन्टा ओ गड्डाचौकी नाकामे ठप कडाइ कैना निर्णय करल कैलालीके प्रमुख जिल्ला अधिकारी खगेन्द्र रिजाल जानकारी डेलै ।

उहाँ दुनु जिल्लामे किनमेल लगायतके टमान बहाना बनाके भारतओर जैना नेपालीहुकनहे गौरीफन्टा ओ गड्डाचौकी नाकामे कडाइ कैना बटैलै । उपचार करे जउइयाके हकमे हकमे सम्बन्धित स्वास्थ्य संस्थाके प्रेषण पूर्जा अनिवार्य डेखाई पर्ना व्यवस्था करल प्रजिअ रिजाल बटैलै ।

रोजगारीके लाग भारत जउइया भर आधार कार्ड लगायतके कागजपत्र डेखाई पर्ना बा । ओस्टेक करके स्थलमार्ग हुके भारतसे लौटना नेपालीहे स्वदेश प्रवेश कराईबेर सक्कुहुनके अनिवार्य जुरी मापन ओ एन्टिजेन विधिसे कोरोना परीक्षणके व्यवस्था कैना निर्णयसमेत करल बा । प्रमुख जिल्ला अधिकारी रिजालके अनुसार गौरीफन्टा नाकाके हकमे स्वास्थ्य कार्यालय कैलाली ओ गड्डाचौकी नाकाके हकमे स्वास्थ्य कार्यालय कञ्चनपुर परीक्षणके व्यवस्था मिलाई ।

नेपाल प्रवेश कैना व्यक्तिहे नाकासे जिल्लागत रुपमे छुट्याके सम्बन्धित जिल्ला ओ स्थानीय तहमे पठैना व्यवस्थासमेत मिलाजाई ।

नाकासे लौटुइयाके प्रभावकारी ढंगसे जिल्लागत अभिलेख रख्न नेपाल प्रहरी ओ सशस्त्र प्रहरी संयुक्त रुपमे काम कैना प्रभावकारी स्वास्थ्य परीक्षणकके लाग जनशक्ति ओ स्रोत साधनके व्यवस्थापनके लाग सामाजिक विकास मन्त्रालयहे अनुरोध कैना तथा गौरीफन्टा नाकामे होल्डिङ सेन्टर स्थापना कैना धनगढी उपमहानगरपालिका ओ गड्डाचौकी नाकाके लाग भीमदत्त नगरपालिकाहे अनुरोध कैना निर्णयसमेत करल स्थानीय प्रशासन जनैलै बा ।

होल्डिङ सेन्टर स्थापना कैना सोम्मार दुनु जिल्लाके प्रमुख जिल्ला अधिकारीसहित सुरक्षा निकायकके प्रमुख संयुक्त रुपमे गौरीफन्टा नाकाके स्थलगत निरीक्षणसमेत करले बटै ।