कोरोनासे मंगरके रोज थप ६ जहनके मृत्यु
पहुरा समाचारदाता
धनगढी, २१ वैशाख । कोरोना भाइरस संक्रमणसे कैलालीमे थप ६ जहनके मृत्यु हुइल बा । धनगढी उपमहानगरपालिका वडा नम्बर ७ के ७७ वर्षिया महिला ओ वडा नम्बर १३ के २२ वर्षिय पुरुषके मृत्यु हुइल हो ।
महिलाके मंगर बिहान साढे २ बजे ओ पुरुषके सोम्मार रात साढे ११ बजे मृत्यु हुइल जिल्ला प्रशासन कार्यालय कैलालीके सूचना अधिकारी शिवराज जोशी बटैलैं ।
महिलाके गैल १२ गते पीसीआर रिर्पोट पोजेटीभ आइल रहे कलेसे पुरुषके सोम्मार सेती प्रादेशिक अस्पतालमे भर्ना करलमे एन्टिजेनबाट चेक करेबेर रिपोर्ट पोजेटिभ आइल रहे । उहाँहुकनके उपचारके क्रममे सेती प्रादेशिक अस्पतालमे मृत्यु हुइल हो ।
अस्टेक कञ्चनपुरके भिमदत्त नगरपालिका १२ घर रहल ७१ वर्षिय पुरुषके फेन सेती प्रादेशिक अस्पतालके इमर्जेन्सी वार्डमे उपचारके क्रममे मृत्यु हुइल जिल्ला प्रशासन कार्यालय कैलाली जनैले बा ।
एन्टिजेनसे चेक करेबेर रिपोर्ट पोजेटिभ आइलमे उहाँक मंगर बिहान ३ बजे मृत्यु हुइल हो ।
अस्टेक दार्चुलाके मालिकार्जुन गाउँपालिका वडा नम्बर ८ के ६६ वर्षिय पुरुषके फेन एन्टिजेनसे चेक करेबेर रिर्पोट पोजेटिभ आइलमे सेती प्रादेशिक अस्पतालके इमर्जेन्सी वार्डमे सोम्मार रात ९ बजे मृत्यु हुइल हो ।
अस्टेक बझाङके २६ वर्षिय पुरुषके फेन गत १४ गते एन्टिजेनसे चेक करेबेर रिर्पोट पोजेटिभ आइलमे सेती प्रादेशिक अस्पतालके इमर्जेन्सी वार्डमे सोम्मार रात साढे १० बजे मृत्यु हुइल जनागिल बा ।
अस्टेक सेतीमे उपचाररत बर्दियाके ३० वर्षिय पुरुषके मृत्यु हुइल बा । सोम्मार श्वासप्रश्वासमे समस्या डेखाइलपाछे उहाँहे अस्पताल भर्ना करल रहे । पीसीआर रिपोर्ट पोजेटीभ आइलमे रात २ बजे उपचारके क्रममे मृत्यु हुइल जिल्ला प्रशासन कार्यालय कैलालीके सूचना अधिकारी जोशी बटैलैं ।
