प्रधानमन्त्री ओली संसद्के विश्वास गुमैलैं
पहुरा |
२७ बैशाख २०७८, सोमबार
काठमाडौं, २७ वैशाख । प्रधानमन्त्री केपी शर्मा ओली संसद्के विश्वास गुमैले बाटैं । प्रतिनिधिसभाके आज (सोम्मार) बैठल बैठकमे ओलीसे पेस करल विश्वासके मतके प्रस्ताव संसद्मे अस्वीकृत हुइल बा ।
ओलीसे ढरल प्रस्तावके पक्षमे ९३ जाने सांसद मतदान करले रहैं । विपक्षमे १२४ प्रमुख प्रतिपक्ष दल नेपाली काँग्रेस, नेकपा (माओवादी केन्द्र), जसपाके (उपेन्द्र यादव–बाबुराम भट्टराई) समूहके सांसद मत डेले बाटैं ।
तटस्थ १५ मत परल सभामुख जानकारी करैलैं । एमालेके झलनाथ खनाल–माधवकुमार नेपाल समूहके २७ सांसद अनुपस्थित रहैं । आजके मतदानमे जम्मा २ सय ३२ जाने सांसद सहभागी रहैं । उहाँ विश्वास प्राप्त करेक लाग १ सय ३६ मत पैना आवश्यक रहे ।
