जनमोर्चासे थापाहे संसदीय दलके नेतासे हटाइल
पोखरा, २९ वैशाख । राष्ट्रिय जनमोर्चा गण्डकी प्रदेशके संसदीय दलके नेतासे कृष्ण थापाहे हटैले बा । जनमोर्चा महासचिव मनोज भट्ट संसद सचिवालयहे उ जानकारी डेलैं ।
गिल वैशाख १० गते थापासहित बैठल जनमोर्चा केन्द्रीय समितिके बैठक ओ १२ गते दलके नेताके हैसियतमे थापाके अध्यक्षतामे बैठल बैठकसे करल निर्णय पालना नैकरल कारण दलके नेतासे हटाइल भट्ट जनैले बाटैं ।
उ बैठकसे गण्डकी प्रदेशमे नेपाली काँग्रेस, माओवादी केन्द्र ओ जनता समाजवादी पार्टीसँग मिलके नयाँ सरकार बनैना निर्णय करले रहे । पार्टी निर्णय ओ निर्देशन विपरित काम करल कटी जनमोर्चासे थापाहे बुधके रोज स्पष्टीकरण पुछल रहे ।
थापा स्पष्टीकरण डेना अटेर करल जनमोर्चा केन्द्रीय सचिवालयके बुधके बैठल जुम बैठकसे तत्काल संसदीय दलके नेतासे हटैना निर्णय करल महासचिव भट्ट संसद सचिवालयमे दर्ता करल पत्रमे उल्लेख बा ।
थापाहे संसदीय दलके नेतासे हटैलेसे फेन औरे नेता भर चयन नैकरल जनमोर्चा जनैले बा ।
जनमोर्चा थापाहे दलके नेतासे हटैलेसे फेन सांसद पदसे नैहटाइल काँग्रेस नेतृत्वके विपक्षी गठबन्धनहे तत्काल बहुमत नैपुगी । थापाहे सांसद सदस्य नैरहना मेरिक कारवाही करलेसे किल विपक्षी गठबन्धनहे बहुमत पुगठ ।
यहोर, सांसद थापा कलैं अपनहे स्पष्टीकरण पुछल विषयमे जानकारी नैरहल बटैलैं । बुधके बागलुङके जैमिनीस्थित घरमे पुगल कटी उहाँ स्पष्टीकरण पुछल विषय पार्टीसे जानकारी नैकराइल बटैलैं ।
