गण्डकीके मुख्यमन्त्रीमे पृथ्वीसुब्बा नियुक्त

पोखरा, २९ वैशाख । गण्डकी प्रदेशमे एमाले संसदीय दलके नेता पृथ्वीसुब्बा गुरुङ फेन मुख्यमन्त्री बनल बाटैं । मुख्यमन्त्रीमे काँग्रेस नेतृत्वके चारदलीय गठबन्धनसे बहुमतके दावीसहित पत्र बुझैलेसे फेन प्रदेश प्रमुख सीताकुमारी पौडेल प्रदेशसभामे भारी दलके हैसियतमे एमालेके संसदीय दलके नेता गुरुङहे सरकार गठन करना आह्वान करलपाछे गुरुङ फेन मुख्यमन्त्री नियुक्त हुइल हुइट ।

गुरुङसे आज (बुधके रोज) सपथ लेना तयारी हुइल बा । उहाँ अब्बे प्रदेश प्रमुखके निवास पुगसेकल बाटैं । प्रदेश प्रमुख कार्यालयसे ३१ जानेक हस्ताक्षर नैपुगल ओ चार दलके आधिकारीक पत्र फेन नैआइल कटी गुरुङहे मुख्यमन्त्रीमे नियुक्त करल हो ।

अपनविरुद्ध अविश्वास प्रस्ताव दर्ता हुइलपाछे मतदान हुइनासे एक दिन आघे बैशाख २६ मे राजीनामा डेहलपाछे गुरुङ काम चलाउ सरकारके मुख्यमन्त्री रहैं । मुख्यमन्त्रीके राजीनामापाछे प्रदेश प्रमुख पौडेल संविधानके धारा १६८ के उपधारा २ बमोजिम तीन दिनभित्तर सरकार गठन आव्हान करले रही । उ धारामे प्रदेशसभामे कौनो फेन दलके स्पष्ट बहुमत नैरहल अवस्थामे दुई वा उहिनसे ढेर दलके समर्थनमे बहुमत प्राप्त करना प्रदेश सांसदहे प्रदेश प्रमुखसे मुख्यमन्त्री नियुक्त करना उल्लेख बा ।

चार दलसे बहुमत दावीसहित प्रदेशप्रमुख समक्ष पत्र दर्ता कराइलपाछे राष्ट्रिय जनमोर्चाके ३ मध्ये २ सांसद अप्ने विपक्षी गठबन्धनमे नैरहल बटाइलपाछे बहुमत पुगे नैसेकल कटी संविधानके धारा १६८ के उपधारा ३ बमोजिम प्रदेशसभामे सबसे ढेर सांसद रहल एमाले संसदीय दलके नेताहे मुख्यमन्त्रीमे नियुक्त करल हो । राजमो संसदीय दलके नेता कृष्ण थापा ओ औरे संसद खिमबिक्रम शाही अपने कौनो फेन गठबन्धनमे नैरहल कटी विज्ञप्ति निकारलपाछे बहुमत दावी नैपुगल प्रदेश प्रमुखके कार्यालय जनैले बा । काँग्रेस, माओवादी केन्द्र, राष्ट्रिय जनमोर्चा ओ जनता समाजवादी दल अपन पक्षमे सभामुखसहित ३२ सांसद रहल कटी प्रदेश प्रमुख समक्ष गिल रहे । गठबन्धनसे काँग्रेस संसदीय दलके नेता कृष्णचन्द्र नेपालीहे मुख्ममन्त्रीमे आघे सारल रहे ।

यीआघे जनमोर्चा अपन संसदीय दलके नेतासे कृष्ण थापाहे हटाइल पत्र प्रदेशसभामे जानकारी कराइलपाछे विपक्षी गठबन्धन सरकार गठनके लाग पहल आघे बह्रल हो । राष्ट्रिय जनमोर्चा संसदीय दलके नेता कृष्ण थापासे पार्टीके निर्देशन (ह्विप) बिपरीत काँग्रेस नेतृत्वके विपक्षी गठबन्धनहे समर्थन नैकरलपाछे बुधके किल स्पष्टीकरण पुछल रहे । मने स्पष्टीकरण नैडेके थापा गृहजिल्ला बागलुङ पुगल रहैं ।

६० सदस्यीय प्रदेशसभामे सरकार गठनके लाग ३१ सांसद चाहठ । अब्बे सत्तासीन एमाले ओ विपक्षी गठबन्धनमे २८÷२८ जाने सांसद बाटैं । राष्ट्रिय जनमोर्चाके ३ सांसदसे जिहिनहे समर्थन करी ओक्रेहे सरकार बन्ना अवस्था हुइलपाछे राजमो निर्णायक शक्ति बनल रहे । राजमो केन्द्रसे विपक्षी गठबन्धनहे सहयोग करना कहलपाछे अन्य तीन दलसे मुख्यमन्त्री पृथ्वीसुव्वा गुरुङ बिरुद्ध बैशाख २ मे अविश्वास प्रस्ताव पेश करल रहे । बैशाख २७ मे अविश्वास प्रस्तावउप्पर मतदान हुइना कार्यसूची तोकलमे ओकर आघेक दिने मुख्यमन्त्री गुरुङ राजीनामा डेले रहैं । विपक्षी गठबन्धनसे राष्ट्रिय जनमोर्चाके तीन सांसदके समेत हस्ताक्षर करे खोजल उ पार्टीके संसदीय दलके नेता कृष्ण थापा हस्ताक्षर करे नैमानलपाछे गठबन्धन हच्कल रहे । मने राजमोसे थापाहे संसदीय दलके नेतासे हटाइलपाछे सचेतक पियारी थापा अपन तीन सांसदके समर्थन रहल कटी गठबन्धनहे सहयोग करना कहलपाछे चार दलके नेता प्रदेश प्रमुखकेमे गैल रहैं । मने जनमोर्चाके सांसदके एकमत नैहुके विपक्षी गठबन्धन सफल हुइ नैसेकल ।