केपी ओली प्रधानमन्त्री नियुक्त, शपथ आज
काठमाडौं, ३१ वैशाख । नेकपा एमाले संसदीय दलके नेता केपी शर्मा ओली प्रधानमन्त्री नियुक्त हुइल बाटैं । राष्ट्रपति विद्यादेवी भण्डारी संविधानके धारा ७६(३) अनुसार संसदके सबसे भारी दलके संसदीय दलके नेता ओलीहे प्रधानमन्त्रीमे नियुक्त करले बाटी ।
राष्ट्रपति कार्यालय स्रोतके अनुसार शपथ आझी (शुकके) २ बजे हुइक लाग बा ।
प्रधानमन्त्री ओली २७ वैशाखमे संसदके विश्वास पाइ नैसेकलपाछे राष्ट्रपति तीन दिनभित्तर संविधानके धारा ७६ (२) अनुसार दुई वा दुईसे ढेर दलके समर्थनमे सरकार गठनके लाग आह्वान करले रहे ।
वैकल्पिक सरकार गठनके प्रयासमे जुटल नेपाली काँग्रेस ओ माओवादी केन्द्र बहुमत जुटैना असफल रहल । जनता समाजवादी पार्टी (जसपा) के महन्थ ठाकुर–राजेन्द्र महतो पक्षसे नयाँ सरकार गठनके लाग साथ नैडेकल कलेसे एमालेके माधवकुमार नेपाल समूहके सांसदहुक्रे वैकल्पिक सरकार गठनके लाग बहुमत पुग्ना मेरिक राजीनामा नैडेलैं ।
बहुमत नैपुग्ना हुइलपाछे काँग्रेस–माओवादी गठबन्धन सरकारके लाग दाबी नैकरल ।
उपाछे राष्ट्रपति ७६ (३) अनुसार संसदके सबसे भारी दलहे सरकार गठनके अवसर डेली । प्रधानमन्त्री ओली आब ३० दिनभित्तर विश्वासके मत डेहेपरी, नैटे धारा ७६(५) अनुसार सरकार गठनके प्रयास हुइ । उ फेन असफल हुइलेसे मुलुक मध्यावधि चुनावओर जाइ ।
