निषेधाज्ञा उल्लंघन करुइया ७ हजार ढेरहे कारबाही

कञ्चनपुर, ३१ वैशाख । कञ्चनपुरमे निषेधाज्ञा उल्लंघन करुइया ७ हजार ढेरहे प्रहरी कारबाही करले बा । कोरोनाके संक्रमण उच्च रूपमे बह्रल ओरसे कञ्चनपुरमे निषेधाज्ञा जारी करल बा । निषेधाज्ञा जारी करलेसे फेन उहिनहे उल्लंघन करना कार्य भर रुकल नैहो ।
सुरक्षा निकायसे निषेधाज्ञा पालना कराइक लाग दैनिक सडक, बजार क्षेत्रमे जोखिमके बेवास्ता करटी खटल बाटैं । निषेधाज्ञाके पालना नैकरना, स्वास्थ्य मापदण्ड पालना नैकरना व्यक्ति तथा सवारी साधानउप्पर प्रहरी कारबाहीसमेत करटी आइल बा ।
जिल्ला प्रहरी कार्यालय कञ्चनपुरके प्रहरी नायव उपरीक्षक अमरबहादुर थापा क्षेत्रीके अनुसार दुई साताके अवधिमे निषेधाज्ञा नैमानल ७ हजार ९ सय ५६ सवारी साधन ओ व्यक्तिहे कारवाही करल बा ।
वैशाख १६ गतेसे जारी करल निषेधाज्ञाके अवधिमे ४ हजार ४ सय ३० व्यक्ति, ५ हजार ९ सय ९७ छोट सवारी साधन ओ १ हजार ६० भारी सवारी साधन कके ७ हजार ९ सय ५६ हे कारवाही करल हो ।
दुई साताके अवधिमे किल ७ हजार ५ सय ७५ मनैन्हे सम्झाई बुझाई करके प्रहरी छोरल जनैले बा । ओहे क्रममे ७ हजार ७ सय ४८ जहनहे मास्क वितरण करले बा । ओहे क्रममे २ सय ८१ जहनहे नगद जरिवाना करके छोरले बा । जरिवाना बाफत १४ हजार २ सय राजस्व समेत अशुल करले बा ।
