त्यो पर्दैन

खुकुरीभन्दा कर्द लाग्ने ?

यहाँ पोथी बास्न खोज्ने ?

त्यो पर्दैन ।

***

म हुकुम चलाउन आएको हुँ

पद र आश्वासन दिन आएको हुँ

म मेरै शासन चलाउन आएको हुँ

मलाई जिम्मेवारीको

पाठ तिमी नपढाउनू

त्यो पर्दैन ।

***

रुँदा रुँदै बरु हाँस्नु

श्रद्धाञ्जलिहरुको भिडबाटै

सके मलाई बधाई दिनु

मैले गरेका रमिताहरु हेरेर

बरु मेरै गुनगान गाउनु

तर,मलाई नैतिकताको

याद तिमी नदिलाउनू

त्यो पर्दैन ।

***

अक्सिजनको सिलिन्डर

कहाँ छ मेरो सिंहदरबारमा ?

ओखतीको त्यो पुन्तरो

कहाँ छ मेरो बालुवाटारमा ?

किन भिखारीझैँ माग्छौ

यी सब कुरा ,

बरु ओहदा माग,नियुक्ति माग

उखान टुक्काकाे, त्यो सन्दुक माग

सबथोक छन् मसँग

तर मलाई मानवताको

सम्झना तिमी नगराउनू ।

त्यो पर्दैन ।