सुदूरपश्चिम सरकारके समर्थन फिर्ता नैलेना निर्णय
धनगढी, १२ जेठ । नेकपा एमालेके सुदूरपश्चिम प्रदेश संसदीय दलके बैठक तत्काल सरकारके समर्थन फिर्ता नैलेना निर्णय करले बा ।
आज बैठल संसदीय दलके बैठकसे माओवादी केन्द्र नेतृत्वके सरकारके समर्थन कायमे करना निर्णय करल हो ।
कोभिड–१९ महामारी लगायतके अवस्थाहे हेरके तत्काल समर्थन फिर्ता नैलेना ओ यीबारे सब दलसँग छलफल करना निर्णय करल प्रदेशसभा सदस्य पूर्णा जोशी जानकारी डेली ।
नेकपा (एमाले) के स्थायी कमिटीके बैठकसे सुदूरपश्चिम प्रदेशके सरकारहे डेहल समर्थन फिर्ता लेना निर्णय करल रहे । उ निर्णयपाछे सुदूरपश्चिम प्रदेश सभाके एमाले संसदीय दलके बैठक बैठल रहे । स्थायी कमिटीहे चुनौती डेटी समर्थन फिर्ता नैलेना निर्णय करलपाछे माओवादी नेतृत्वके सुदूरपश्चिम सरकारके संकट टरल बा ।
सुदूरपश्चिम प्रदेशसभामे एमालेके २५ सांसद बाटैं । बुधके बैठकमे २१ जाने सहभागी रहैं ।
सुदूरपश्चिम प्रदेशसभामे अब्बे ५२ सदस्य बाटैं । सबसे भारी दल एमालेके २५, नेकपा माओवादी केन्द्रके १३, नेपाली काँग्रेसके १२ ओ जनता समाजवादी पार्टी (जसपा)के २ जाने प्रदेशसभा सदस्य बाटैं । तत्कालीन एमाले ओ माओवादी केन्द्रबीच रहल भागबण्डाके आधारमे माओवादीके त्रिलोचन भट्ट मुख्यमन्त्री बाटैं ।
एमाले अध्यक्ष केपी शर्मा ओली पक्षीय नेता किल रहल स्थायी कमिटी बैठकसे सोम्मारके प्रदेश सरकारहे डेहल समर्थन फिर्ता लेना निर्णय करटी मन्त्रीहुक्रे राजीनामा डेना कहल रहे ।
