सुदूरपश्चिम संसदीय दलके नेता शाहसे अध्यक्ष ओलीहे स्पष्टीकरण
धनगढी, २३ जेठ । एमाले सुदूरपश्चिम प्रदेश संसदीय दलके नेता प्रकाश शाह अध्यक्ष केपी शर्मा ओलीहे स्पष्टीकरण डेले बाटैं । उहाँ दोसरचो आज पार्टीहे स्पष्टीकरण डेहल हुइट ।
पहिलचो एमाले प्रदेश कमिटीहे स्पष्टीकरण बुझाइल शाह दोसरचो केन्द्रीय अध्यक्ष केपी शर्मा ओलीहे स्पष्टीकरण डेलैं ।
प्रदेश अध्यक्ष कर्ण थापा ओ राजेन्द्र रावलहे डेहल स्पष्टीकरण चित्त बुझ्ना नैहुइल कटि बिफेक रोज अध्यक्ष ओली शाहहे स्पष्टीकरण पुछ्ले रहैं ।
अँट्वार बिहान शाह स्पष्टीकरणके जवाफ पठैले बाटैं । शाह प्रदेश कमिटीके सचिव राजेन्द्र रावलहे मेलमार्फत स्पष्टीकरण पठैले बाटैं । सचिव रावल अध्यक्ष ओली, महासचिव ईश्वर पोख्रेल ओ एमाले पार्टी सचिव शेरबहादुर तामाङहे उ स्पष्टीकरण पठाइल जानकारी डेलैं ।
अध्यक्ष ओलीसे शाहहे पुछल स्पष्टीकरणमे पार्टी केन्द्रसे समर्थन फिर्ता लेसेकल विपक्षी दलके प्रदेश सरकारके मन्त्री पदमे काहे रहल ? कटि पुछल बा । अस्टेक गुटके भेलामे सहभागी हुइना ओ औरेहे समेत सहभागी हुइना उत्प्रेरित करना करल आरोप लगाइल बा ।
एमाले सुदूरपश्चिम प्रदेश संसदीय दलके विधान समेतके आधारमे पार्टीके साधारण सदस्य समेत नैरहना मेरिक काहे निष्कासन नैकरना ? कना चित्तबुझ्ना जवाफ मागल रहे ।
