थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ३० जेठ २६४५, अत्वार ]
[ वि.सं ३० जेष्ठ २०७८, आईतवार ]
[ 13 Jun 2021, Sunday ]

कञ्चनपुरमे ५१ दिन बाद कोरोनाके मृत्यु शुन्य

पहुरा | २६ जेष्ठ २०७८, बुधबार
  •  
  •  
  •  
  •  
  •  
  •  
  •  
  •  
कञ्चनपुरमे ५१ दिन बाद कोरोनाके मृत्यु शुन्य

कञ्चनपुर, २६ जेठ । कोरोना संक्रमणके दोसर लहर सुरु हुइलपाछे कञ्चनपुरमे ५१ ीदन बाद सोम्मार कोरोना संक्रमणसे मृत्यु हुइनाके संख्या शुन्य हुइल बा । वैशाख ४ से संक्रमणके कारण मृत्यु हुइनाके संख्या बह्रटी रहे । कुछ दिनसे कम हुइल सोम्मार ओ मंगरके मृत्यु शुन्य बा ।

जिल्ला स्वास्थ्य कार्यालयके अनुसार दोसर लहर सुरु हुइलपाछे वैशाख ४ गते १ जहनके मृत्यु हुइल रहे । टबसे दिनहुँ मृत्यु हुइना क्रम जारी रहे । वैशाख २८ मे एक्के दिन १५ जहनके मृत्यु हुइल रहे । उ दिन ११ जहनके महाकाली अस्पतालमे, २ के होम आइसोलेसनमे ओ २ जहनके सेती प्रादेशिक अस्पतालमे मृत्यु हुइल रहे ।

यी अवधिमे महाकाली अस्पतालमे दैनिक ४÷५ जहनके मृत्यु हुइल बा । महाकाली अस्पतालमे फेन कुछ दिनसे मृत्युदर घटल बा । महाकाली अस्पतालमे संक्रमणके कारण १ सय जहनके मृत्यु हुइल रहे, जोन दोसर लहरबाद हुइल हो । पहिल लहरमे महाकाली अस्पतालमे ३ सय जाने भर्ना हुइलेसे फेन मृत्यु हुइल नैरहे ।

‘आब मृत्युदर घटल बा, बिरामी थप्ना क्रम फेन कम हुइल बा,’ अस्पतालके कोभिड फोकल पर्सन डा. गोविन्द रोकाया कलैं, ‘भाइरस फेन अपन नेचर बदलल जस्टे लागल बा, सामान्य मेरिक बिरामी अप्ठेरो हुके अस्पताल अइना क्रम घटल बा, अब्बे दीर्घरोगीहुकनमे किल समस्या डेखाइल बा  ।’ उहाँक अनुसार अब्बे दिनमे एक÷दुई जाने किल भर्ना हुइटैं । संक्रमण ढेर हुइल दैनिक २५/३० जाने भर्ना हुइँट् ।

जिल्ला स्वास्थ्य कार्यालयके अनुसार जिल्लामे हालसम कोरोना संक्रमणसे १ सय ७९ जहनके मृत्यु हुइल बा । जोनमध्ये पहिल लहरमे १६ जहनके ओ दोसर लहरमे १ सय ६३ जहनके मृत्यु हुइल बा । ‘जिल्लाभरमे लम्मा समयपाछे मृत्यु शुन्यमे पुगल बा,’ जिल्ला स्वास्थ्य कार्यालयके जनस्वास्थ्य निरीक्षक सिद्धराज भट्ट कलैं, ‘आब संक्रमण दर फेन घटल बा ।’

महाकाली अस्पतालमे कुछ दिनआघेसे बीचबीचमे मृत्यु शुन्य हुइलेसे फेन जिल्लाभरमे वैशाख ४ पाछे पहिलचो सोम्मार मृत्युदर शुन्य हुइल हो । पछिल्का समय परीक्षणके दायरा बह्रनाके साथे ग्रामीण भेगमे रहल लक्षणसहितके संक्रमितके संख्या फेन घटल बा ।

मंगरके कञ्चनपुरमे ५१ ज्हनमे संक्रमण पुष्टि हुइल बा कलेसे ४७ जाने संक्रमणमुक्त हुइल बटैं । हाल जिल्लामे ५ सय २० सक्रिय संक्रमित रहल स्वास्थ्य कार्यालय जनैले बा । जिल्लामे वैशाखपाछे किल ५ हजार ३० के पीसीआर परीक्षण करेबेर ३ हजार २ सय ७९ मे संक्रमण पुष्टि हुइल बा । जोनमध्ये ३ हजार ३ सय २ जाने चोखाइल बटैं । वैशाखयहोर किल १३ हजार ७ सय ९८ के एन्टिजेन परीक्षण हुइल बा । जोनमध्ये २ हजार १ सय ३९ मे संक्रमण पुष्टि हुइल बा ।

जनाअवजको टिप्पणीहरू