अपांगता हुइल व्यक्तिहुकनके घर दैलोमे व्हिल्चियर ओ स्वास्थ्य सामग्री वितरण

पहुरा समाचारदाता
धनगढी,३० जेठ । सर्वाङिण अपांगता विकास समाज नेपाल ओ दिगो विकास समाजके सयुक्त सहकार्य तथा जोशीपुर गाउँपालिकाके आर्थिक सहयोगमे आज जोशीपुरमे रहल अपांगता हुइल व्यक्तिहुकनहे घर दैलोमे जाके व्हिल्चियर तथा स्वास्थ्य सामग्री वितरण करल बा ।

गाउँपालिकाके उपाध्यक्ष गीता कठरिया ओ सस्थाके प्रबन्ध निर्देशक नन्दराज भट्ट अति अशक्त, कमजोर आयस्तर रहल समाजके अपांगता नागरिकहे उ सामग्री वितरण करल हुइट । वितरण करल सामाग्रीमे १४ थान व्हिल्चियर, २ थान वाकर, १० थान उज्जर छडी, १० थान विशेष मेरिक लठ्ठी ओ बैशाखी, १० पाकेट सेनिटरी, ४ थान ट्राईसाईकल, करके ५० जनहनहे सहायक सामग्री वितरण करल हो । २०० ठो प्याड, १०० ठो सर्जिकल मास्क, १० बोटल सेनेटाइजर, १० थान डाईफर वितरण करल बा ।

उ सामान वितरण कार्यक्रममे वडा जनप्रतिनिधि, कार्यक्रम जिल्ला अधिकृत ईन्द्र बहादुर पाली ओ अपांगता अधिकारकर्मी वितरण करल रहिट । सामग्री बुझलपाछे अपांगता अभिभावकसे हार्दिक धन्यवाद ज्ञापन सहित स्वागत करले रहिट कलेसे कार्यक्रममे सहभागी सहायक सामग्री व्हिल्चियर, बैशाखी ओ स्वास्थ्य सामग्री पाइलपाछे खुसी व्यक्त करले रहिट ।

बालबालिका, युवा, जेष्ठ नागरिक, बेवारिसे, असहाय अपांगता रहल नागरिक, बौद्धिक, मनोसामाजिक तथा टमान रोगसे, दुर्घटनामे परके बेसहारा बनल ओइने सरकारसे प्रदान कैना सामाजिक सुरक्षा भत्ता पैनासेफे बन्चित हुइटी रहल अपांगता अभिभावक प्रभात चौधरी बटैलै । ओइनके परिचयपत्र बनाके सहयोग कैना बाटमे कौनो पहल नइहुइल उहाँ बटैलै ।

सरकारसे आवश्यक सेवा सुबिधा ओ सहायक सामग्री व्हिलचियर उपलब्ध कराके सहज रूपमे शौच टे सेकी । मने नेपालके संविधान– २०७२ ओ अपांगता रहल व्यक्तिहुकनके अधिकार सम्बन्धी ऐन – २०७४ मे असहाय व्यक्तिके पुनस्र्थापनाके जिम्मा स्थानीय सरकारसे लेहे परल उहाँ कहलै । पुर्ण अशक्त असहाय अपांगता रहल व्यक्तिहुकनहे मासिक सामाजिक सुरक्षा बापत रु ३९९० प्रदान कैना ओ ओइनके सहयोगीहे समेत मासिक तीन हजारसे ५ हजारसम स्याहार भत्ता डेहे पर्ना कानूनी प्राबधान रहल बा ।

सर्बोच्च अदालतके अन्तरिम प्रमादेश समेत रहल हुइलेसेफे उ असहाय अपांगता रहल व्यक्तिहुक्रे उपभोग करे नइपाइल हुइट । स्वयं अपने शारीरिक रूपमे अशक्त हुकेफे अपांगता रहल व्यक्ति ओ परिवारके सुरक्षा कैना अपन ज्यानके प्रवाह नइकरके अपांगता अधिकारकर्मी नन्दराज भट्ट आवश्यक सहयोग सामग्रीके लाग व्यक्तिगत ओ सस्थागत रूपमे हरदम सहयोग रहल अपांगता अभिभावक रजनी चौधरी बटैली ।

अपांगताके शसक्तिकरण, सामाजिक समायोजन, प्रमाणमे आधारित वकालत ओ दूर दराजमे रहल अपांगता नागरिकके घर घरमे पुगके अपांगता नागरिक के जीवन जोगे परठ, अभियानके सरकारसे अभिनसम मुल्यांकन कैना प्रतिबद्धता व्यक्त नइकरल उहाँ कहली ।