सम्झौता ओराइल ३ वर्षमे फेन निर्माण पूरा नैहुइल कञ्चनपुरके दुई पुल
कञ्चनपुर, ४ असार । निर्माण सम्पन्न करेपरना सम्झौता ओराइल तीन वर्ष पूरा हुइलेसे फेन कृष्णपुर नगरपालिका–१ पहरिया–सुन्दरीफाँटा जोरना खारखोला ओ सुन्दरीफाँटा–दोमिल्ला जोरना ओदाल खोलाके पुल अभिन निर्माण पूरा हुइल नैहो ।
उहाँ पुल नैहुके स्थानीय बासिन्दा सास्ती खेप्टी आइल बटैं । ज्यान जोखिमे ढरके बाढ आइल लडिया नाँघे परना बाध्य बटैं । दुनु पुल निर्माणके लाग २०७३ भदौ १७ मे थेगिन कन्ट्रक्सन ठेक्का सम्झौता करले रहे । मने, निर्माण कम्पनीके चरम लापरवाहीके कारण पुल निर्माण पूरा नैहुइल स्थानीय अर्जुन साउँदके आरोप बा ।
‘आजकल, आजकल कटि पुल निर्माणमे विलम्ब करल बा,’ उहाँ कलैं, ‘पुल निर्माण पूरा नैकरल ठेकेदार कम्पनीविरुद्ध संघर्षमे उत्रन बाध्य बटि ।’ स्थानीय ठेकेदार कम्पनीहे कालो सूचीमे ढरना समेत माग करले बटैं ।
दुनु पुलके ठेक्का हुइल दुई वर्षभित्रे अर्थात् २०७४ फागुन १५ मे निर्माण सम्पन्न करना सम्झौतामे उल्लेख बा । भौतिक पूर्वाधार विकास मन्त्रालयसँग खारखोला पुलके लाग ६ करोड ६९ लाख ६७ हजार ओ ओदाल खोला पुलके लाग ५ करोड ४७ लाख ४ हजार २०० रुपैयाँमे ठेक्का सम्झौता हुइल रहे ।
कृष्णपुर नगरपालिकाके नगरप्रमुख कर्णबहादुर हमाल समयमे पुल निर्माण करना सम्बन्धित निकायहे कलेसे फेन सुनुवाइ नैहुइल बटैलैं । ठेकेदार कम्पनीहे फेन ताकेता करटि आइल उहाँक कहाइ बा ।
‘पुल निर्माणके कार्य पूरा करना सम्बन्धित निकायहे टमानचो कले बटि । सुनवाइ हुइ नैसेकल हो,’ उहाँ कलैं, ‘दुनु पुलके ठेक्का पाइल थेगिन कन्ट्रक्सनहे समेत निर्माण कार्य निर्धारित समयमे पूरा करना तोकता करटि आइल बटि ।’
निर्माण कम्पनीके साइड इन्चार्ज प्रकाश पाण्डेय सब सामग्री आसेकल ओ अकबके कुछ दिनमे पुलके ढलानके कार्य सुरु हुइना बटैलैं । अब्बे वर्षातके कारण ओ निषेधाज्ञा हुके पुल समयमे निर्माण हुइ नैसेकल उहाँक कहाइ बा ।
