पत्रकार पनेरुहे ज्यान मर्ना धम्कीके विरोध
पहुरा समाचारदाता
धनगढी, ६ कुवाँर । दिनेश खबरके सम्पादक नवराज पनेरुहे ज्यान मर्ना धम्कीके विरोध जनैटी पत्रकार महासंघ ओ ओकर छाता संगठनसे विज्ञप्ती प्रकाशित दोषीहे कार्वाहीके माग करले बटै ।
समाचार एजेन्सीमे आइल समाचार प्रकाशित हुइल विषयहे लेके बाजुराके बडिमालिका नगरपालिकाके उपप्रमुख कविता बिष्टके गोसिया विपिन बिष्ट पत्रकार पनेरुहे मंगरके रोज ज्यान मर्ना डेहल रहिट । महालेखा परीक्षणके प्रतिवेदन अनुसार बाजुरासे न्यूज कारखानामे लिखल समाचार मंगरके रोज प्रकाशित करल आधारमे विष्टसे अश्लिल गाली करटी सम्पादक पनेरुहे ज्यान मर्नासमके धम्की डेहल रहिट ।
समाचार प्रकाशित करल आधारमे फोन करके पत्रकारहे ज्यान मर्ना धम्की डेना गलत रहल कहटी नेपाल पत्रकार महासंघ सुदूरपश्चिम प्रदेश समितिसे ध्यानाकर्षण हुइल जनैले बा । बुधके महासंघके अध्यक्ष योगेश रावलसे विज्ञप्ति जारी करटी समाचारके विषयमे विमती हुइलेसे कानुनी डगर रहटी रहटीफे फोन करके तथानाम गाली गलौचके साथे मर्ना धम्की डेहल घटतनाप्रति सम्बन्धित सरोकारवाला निकायके ध्यानाकर्षण करैले बटी । ‘हम्रे घटनामे संलग्न व्यक्तिहे यथासिघ्र कानुनी कारवाहीके माग करटी,’ अध्यक्ष रावलसे जारी करल विज्ञप्तिमे उल्लेख बा ।
ओस्टेक उहे घटनाके विषयमे पत्रकार महासंघ कैलालीसेफे अपन ध्यानाकर्षण हुइल जनैले बा । महासंघ कैलालीके सचिव प्रेम चौधरीसे विज्ञप्ति जारी करटी कहले बटै, ‘पत्रकारहे गाली गलौच कैना, ज्यान मर्ना धम्की डेना विपिन विष्टहे तत्काल नियन्त्रणमे लेकेृ कानुनी कारवाहीके प्रक्रिया आघे बढैना स्थानीय प्रहरी प्रशासनसँग जोडदार माग करटी ।’
ओस्टेक करके प्रेस युनियन कैलालीसेफे उ घटनाके दोषीहे कारबाहीके दायरामे नन्ना प्रहरी प्रशासनसंग आग्रह करले बा । युनियनके सचिव सीताराम ओझासे विज्ञप्तिमार्फत कहले बटै, ‘प्रेस स्वतन्त्रताके सम्मान कैना सक्कु पक्षसंग आग्रह करटी । पत्रकारहुकनके निर्भयतापूर्वक समाचार संकलन ओ सम्प्रेषण करृे पैना अधिकार हनन् हुइना करके हुइल घटनाके निष्पक्ष छानविनके लाग युनियन जोडदार माग करले बा ।’
ओस्टेक करके प्रेस युनियन लम्की शाखाफे उ घटनाके दोषीहे कारबाहीके माग करले बा । लम्की शाखा अध्यक्ष देवानन्द न्यौपाने एक विज्ञप्ती प्रकाशित करटी दोषीहे कार्वाहीके माग करल हुइट ।
प्रेस चौतारी नेपाल कैलालीके संयोजक भानुभक्त आचार्य, फोटो पत्रकार महासंघ सुदूरपश्चिम प्रदेश समितिके अध्यक्ष विवेक नागरी ओ नेपाल खेलकुद पत्रकार मञ्च कैलालीके मञ्चके महासचिव प्रदिप पाठकसे समाचारके विषयमे असहमती रहलेसे कानुनी उपचारके डगर रहटी रहटी विष्टसे ज्यान मर्ना धम्की डेहल घटनाके भत्र्सना करले बटै । साथे विष्टहे पक्राउ करके कारबाही कैना आग्रह करले बटै ।
