प्रदेश स्तरीय मानव अधिकार रक्षक सम्मेलन
पहुरा समाचारदाता
धनगढी, २२ अगहन । नागरिक समाजके कार्यक्षेत्र ओ मानव अधिकार रक्षकके अधिकार विषयक दुईदिने प्रदेश स्तरीय मानव अधिकार रक्षक सम्मेलन बुधसे धनगढीमे सुरु हुइल बा ।
सुदूरपश्चिम प्रदेशके आन्तरिक ममिला तथा कानून मन्त्री पुर्ण जोशी मानव अधिकार रक्षकहुकनके अधिकार सुनिश्चित करेक लाग प्रदेश सरकार सदा तयार रहना बटैली । उहाँ सदा अपन परिधिभिटर रहिके काम कैना मन्त्री जोशी बटैली ।
उहाँ कहली, सत्य उप्पर धावा बोल्न अथवा हिंसा निम्याइटा कलेसे संस्कृतिहे निषेध करे परठ । महिलाहुक्रे घरभिटरे हिंसामे परल मन्त्री जोशी बटैली ।
राष्ट्रिय मानव अधिकार अयोगके सुदूरपश्चिम प्रदेश प्रमुख मोहनदेव जोशी मानव अधिकार रक्षकके भुमिकामे टमान मेरिक चुनौती भोगे परटी रहल बटैलै । मानव अधिकार सुरक्षा ओ विकासके सन्र्दभमे महत्वपुर्ण भुमिका खेल्टी आइल बटैलै । सुदूरपश्चिम प्रदेशके शिक्षक प्रा.डा. हेमराज पन्त मानव अधिकारके संरक्षण तथा प्रवद्र्धनमे नागरिक समाजके भुमिका बारे कार्यपत्र प्रस्तुत करले रहिट ।
सुदूरपश्चिम प्रदेशमे मानव अधिकारमैत्री कानून निर्माण तथा कार्यान्वयनके अवस्थाबारे सुदूरपश्चिम प्रदेशके मुख्य न्यायाधिवक्ता, कुलानन्द उपाध्यय प्रस्तुत करले रहिट ।
कार्यक्रममे उच्च अदालत बार महेन्दनगरके अध्यक्ष उद्यम भट्ट, कैलाली बारके अध्यक्ष सिद्धराज ओझा, गैरसरकारी संस्था महासंघके प्रदेश अध्यक्ष देवी खनाल, डडेल्धुरा जिल्ला अदालत बार पुर्व अध्यक्ष विष्णु भट्ट, गैरसरकारी संस्थाके केन्द्रीय सदस्य सवित्रा घिमिरे, चित्रा पनेरु, फिरुलाल चौधरी लगायतके टमान जिल्लाके सहभागिता रहल बा ।
कार्यक्रमके इन्सेकके कार्यकारी निर्देशक विजयराज गौतमके अध्यक्षतामे हुइल कलेसे सहजीकरण प्रदेश सयोजक खड्कराज जोशी करले रहिट ।
अन्तराष्ट्रिय मानव अधिकार रक्षकके अधिकार रक्षक दिवस (९ डिसेम्बर) के अवसरमे नागरिक समाज, मानव अधिकार रक्षक ओ सुरक्षाके लाग प्रदेश स्तरीय मानव अधिकार रक्षकबारे इन्सेकसे सम्मेलनके आयोजना करल हो ।
