‘चिसो एस्ट्रे’ चैत ४ गते रिलिज हुइना
पहुरा समाचारदात
धनगढी, २७ फागुन । नेपाली कथानक चलचित्र ‘चिसो एस्ट्रे’ आगामी चैत ४ गते रिलिज हुइना हुइल बा । गाउँसे सहर आइल एक युवकके सहरिया बन्ना यात्रा बोकल चलचित्र ‘चिसो एस्ट्रे’ चैत ४ गतेके लाग रिलिज डेटलक करले बा ।
कवि भूपि शेरचनके कविता ‘चिसो एस्ट्रे’ के थेममे आधारित चलचित्रके निर्माण पक्ष ओ कलाकारके टोली प्रसारप्रचारके लाग सुदूरपश्चिम प्रदेश पुगल बा ।
कञ्चनपुरके महेन्द्रनगरके दिन्स पाल्पाली निर्देशित फिल्ममे धनगढीके दिव्य देवसहित सृष्टि श्रेष्ठ, सुशील पाण्डे, निकुन श्रेष्ठ, नविन लम्साल ओ रविन तामाङके मुख्य भूमिका रहm बा ।
शुकके रोज धनगढीमे आयोजित पत्रकार सम्मेलनमे निर्देशक पाल्पाली भूपि शेरचनके ‘चिसो एस्ट्रे’ शीर्षकके कवितासे प्रभावित होके फिल्म तयार पारल जानकारी करैलैं । फिल्मके मुख्य अभिनेता दिव्य देव अपने गाउँसे सहर अइना मदन नामके चरित्र निर्वाह करल जानकारी डेलैं ।
थिएटरसे फिल्ममे आइल उहाँ गाउँसे सहरमे पुगल मनैन्के सपना कैसिक एस्ट्रेके चुरोटजस्टे बुटठ कना विषयहे फिल्म प्रस्तुत करल जानकारी करैलैं । ओस्टेक, सृष्टि श्रेष्ठ फिल्ममे शालीनताके चरित्रके निर्वाह करले बटि ।
पाल्पालीके लेखन रहल फिल्ममे अजर जंगमके संगीत बा । कंगारु क्रिएसन ओ लोकल सिनेमाके संयुक्त ब्यानरमे निर्मित चलचित्रहे महेशबाबु तिमल्सिनाके प्रस्तुति रहल बा । निर्माणमे भर महेशबाबुहे प्रवीण स्याङ्बा ओ सुष्मिता पराजुली सघैले बटैं ।
सहनिर्मातामे भर रूपेश ढुंगाना, नवीन ढुंगाना ओ सुजन खतिवडा रहल बटैं । निर्माणमे क्रिएटिभ ह्यान्डस् नेपालके फेन सहभागिता बा । उज्जल बस्ताकोटीके छायांकन रहल चलचित्रमे उज्ज्वल ढकाल सम्पादन ओ प्रशान्त रसाइली क्रिएटिभ हेडके जिम्मेवारी निर्वाह करले बटैं ।
