हात्तीपाइले रोगविरुद्धके औषधि कैलारीमे ८० प्रतिशतसे ढेरहे खवाइना लक्ष्य
पहुरा समाचारदाता
धनगढी, २८ फागुन । कार्य सम्पादनमे नेपालके उत्कृष्ट पाँच पालिकामे रहना सफल कैलालीके कैलारी गाउँपालिकामे हात्तीपाइले रोगविरुद्धके औषधि ८० से ९० प्रतिशत जनसंख्याहे खवाइना लक्ष्य राखल बा ।
उहे अनुसार शनिच्चरसे गाउँपालिकामे हात्तीपाइले रोगविरुद्धके आम औषधि सेवन अभियान सुरु हुइल बा । करिब ५० ठो बुथसे हात्तीपाइले रोगविरुद्धके औषधि खवाइना कार्य हुइटी रहल गाउँपालिकाके स्वास्थ्य शाखा प्रमुख वीरेन्द्र सापकोटा जानकारी डेलै ।
ओहकान अनुसार एक बुथमे एक जना स्वास्थ्यकर्मी ओ महिला स्वास्थ्य स्वयम् सेविका हात्तीपाइले रोगविरुद्धके आम औषधि खवाइटी रहल बाटै । हात्तीपाइले रोगविरुद्धके औषधि सेवन अभियानमे गाउँपालिकावासी उत्साहजनक रुपमे सहभागिता जनैटी रहल सापकोटा बटैलै ।‘छुटलहे अँट्वारसे घरभेट कार्यक्रम कैके औषधि खवाब’, उहाँ कहलै ।‘शनिच्चरसे १५ दिनसम अभियान जारी रही ।’
कैलारी गाउँपालिकामे जम्मा ५५ हजार ४३३ जनसङ्ख्या रहल बा । जौनमध्ये हात्तीपाइले रोगविरुद्धके औषधि खैना योग्य रहल ८० से ९० प्रतिशतहे औषधि खवाइना लक्ष्य रहल सापकोटा बटैलै ।‘गर्भवती, दुई बरस टरेक बालबालिका, सिकिस्त बिरामी ओ सात दिनभिट्टरके सुत्केरीबाहेक प्रायः सक्कु जनहनहे औषधि खवाइना लक्ष्य रहल बा’, उहाँ कहलै ।
कैलाली इ बरस १० औं चो हात्तीपाइले रोगविरुद्धके आम औषधि सेवन अभियान चल्टी रहल बा । कैलालीमे इ बरस हात्तीपाइले रोगविरुद्धके तीन मेरके औषधि खवाजैटी रहल बा । इ बरस आइभरमेक्टिन नामक औषधि थप करल बा । गत बरससम डीइसी ओ अल्बेन्डाजोल कैके दुई मेरके औषधि किल खवाइल रहे ।
