जनस्वास्थ्य नीति हलि आइः मन्त्री खडका

पहुरा समाचारदाता
धनगढी, २९ फागुन । सुदूरपश्चिम प्रदेशके सामाजिक विकास मन्त्री लालबहादुर खडका प्रदेश सरकार जनस्वास्थ्य नीति नन्ना तयारी करटी रहल बटैले बा ।

अँटवारके रोज धनगढीमे हुइल ‘विपदके अवस्थामे यौन तथा प्रजनन स्वास्थ्य अधिकार’ विषयक एक कार्यक्रममे बोल्टी उहाँ जनस्वास्थ्य नीति छलफलके क्याविनेटमे पुगल कहटी हालहाली नन्ना बटाइल हुइट । कोरोना महामारीके पहिल चरणपाछे अस्पतालके स्तरोन्नतीमे प्रदेश सरकार लागल कहटी प्रादेशिक अस्पताल, जिल्ला अस्पताल संख्या बह्राइल ओ पालिकामे रहल स्वास्थ्य केन्द्रमे बेड ठप करके डाक्टरसहितके स्वास्थ्य सेवा प्रदान करटी रहल मन्त्री खडका बटैलै ।

महामारीके बेला भारतसे अइना नेपालीहुकन धारेक लाग कैलाली, कञ्चनपुरमे हजार÷हजार बेडके होलडिङ सेन्टरके निर्माण अन्तिम चरणमे बा,’ मन्त्री खडका कहलै, ‘प्रदेश सरकार स्वास्थ्य क्षेत्रमे मजा प्रगति करल सुचाङकमे डेखल बा । यिहे बैशाख भिटरे जिल्ला स्वास्थ्य केन्द्रमे भेन्टीलेटर संचालन कैना कहल रहे मने थोरिक ढिला हुईसेकठ ।’

आन्तरिक मामिला तथा कानून मन्त्री पुर्णा जोशी अब्बे बहुट कुछ बडलल मने दृष्टिकोण बडले नइसेकल बटैली । कोरोना महामारीके सुरुवाटसंगे घरभिटर ढेर महिला आत्महत्या करल घटना आइल, लैङिक हिंसा न्यूनिकरण करेक लाग आब ओकर कारण खोजे पर्ना जरुरी रहल बटैली । मन्त्री जोशी सघीय सरकारसे लिभिङ टुगेडर सम्बन्धी नीति बनैटी रहलफे जानकारी डेली ।

राष्ट्रिय मानव अधिकार आयोग सुदूरपश्चिम प्रदेश संयोजक मोहनदेव जोशी यौन तथा प्रजनन शिक्षा डेहक लाग फेरसे नैतिक शिक्षाके सुरुवाट करे पर्ना जरुरी रहल बटैलै । उहाँ कहलै, अब्बे बालविवाह बह्रल ओरसे उहीहे रोकथाम करेक लाग पहिले जिम्मेबारी घर परिवारके ओ ओकरपाछे समाजके दायित्व हो ।

गौरीगंगा नगरपालिकाके नगर उपप्रमुख अञ्चला चौधरी लैङिक हिंसाके मुख्य दोष बालविवाह, बहुविवाह रहल बटैली । कोरोना महामारीके बेला प्रजननदर बह्रल ओ सुत्केरीके मृत्युदर समेट बह्रल उहाँ बटैली । कोरोनाके बेला जलमल बच्चा रेडजोनमे परलफे नगर उपप्रमुख चौधरी जनैली । नगरपालिकासे कोरोना प्रभावितके लाग ९३ लाख रुप्या बजेट विनियोजन करल मने नीति नइबन्के अभिनसम राहत वितरण करे नइपाइल उहाँ बटैली ।

कार्यविधि अनुसार सरकारसे सुविधा पाइलहे राहत नइडेना कहल बा, उहाँ कहली, ‘सामाजिक सुुरक्षा भत्ता खउइयाहे डेहे नइपैना कहलपाछे राहात वितरण करे नइसेकल हो । नगरपालिका कोरोना संक्रमणमे परल ८ सय ४३ जनहन सिफारिस करल मने ओम्ने दलित, जेष्ठ नागरिक, विधुवा भत्ता, खउइया बटै ।’ कोरोना महामारी उ समुदायहे छुवल ओरसे कार्यविधिमे दोहोरो सुविधा डेहे नइपैना कहलपाछे ओइने राहतसे बन्चित हुइल नगरउपप्रमुख चौधरी बटैली ।

एकता किशोरी समुहके अध्यक्ष लक्ष्मी चौधरी अब्बे बालविवाहमे कमी अइलेसेफे लिभिङ टुगेडरमे बैडना चलन बह्रल बटैली । उहाँ कहली, लौरा लवरीय लिभिङ टुगेडरमे बैडना मने सम्बन्ध विगरलपाछे हिंसामे परिणत हुइना करल उहाँ बटैली ।

कार्यक्रममे बार कैलालीके अध्यक्ष सिद्धराज ओझा कोरोनाके पहिल चरणसे शिक्षा लेहे नइसेकेबेर दुसर चरणमे ढेर मानविय क्षति व्यहोरे परल बटैलै । यौन तथा प्रजनन शिक्षाके कमी हुके अब्बे किशोरीहुक्रनमे ७२ घण्टे औषधी खउइयाके संख्यामे समेट वृद्धि हुइल उहाँ बटैलै ।

कार्यक्रममे इन्सेकके प्रलेख अधिकृत कृष्ण विक, मैनामोति चौधरी, युथ एक्भिस ठाकुर प्रसाद करियाप्रधान, गैरसरकारी संस्था महासंघ कैलालीके उपाध्यक्षख चेतमान साउद, गैरसरकारी संस्था महासंघके प्रदेश सचिव लोकमान धामी, कैलारी गाउँपालिका स्वास्थ्य प्रमुख विरेन्द्र सापकोटा, राष्ट्रिय अपाङता महासघके प्रिया खडका लगायत अपन बाट राखल रहिट । कार्यक्रममे आयूसी बम विपदके अवस्थामे यौन तथा प्रजनन स्वास्थ्यबारे करल अनुसन्धानके रिपोर्ट प्रस्तुत करल रहिट ।

राष्ट्रिय महिला मानवअधिकार रक्षक संजालके केन्द्रीय सदस्य निर्मला बागचन्दके अध्यक्षतामे हुइल कार्यक्रमबारे ओरेक नेपालके कार्यकारी निर्देशक लुभराज न्यौपाने प्रस्त्याइले रहिट । कार्यक्रमके संचालन ओरेक नेपालके सदस्य संगिता अधिकारी करले रही । कार्यक्रम ओरेक नेपाल ओ तंरगिनी फाउण्डेशनके आयोजनामे हुइल रहे ।