वन डढेलो नियन्त्रयण कार्यक्रम
पहुरा समाचारदाता
पहलमानपुर, १ चैत । डिभिजन वन कार्यालय पहलमानपुरके आयोजनामे मंगरके रोज वन डढेलो नियन्त्रण कार्यक्रम हुइल बा ।
डिभिजन वन कार्यालयके अधिकृत गोकुल रिजालके अध्यक्षतामे कार्यक्रममे उहाँ वन डढेलो मानविय लापारवाही ओ जानजानके करटी रहल बटैलै । यिहीहे रोकेक लाग वनजंगल हमार सक्कुहुनके सम्पति हो कना चेतनाके विकास हुई पर्नामे उहाँ जोड डेहल रहिट ।
इलाका प्रहरी कार्यालय सुख्खडके प्रमुख लक्ष्मण शाही वनजंगलके लग्ना डढेलोके कारण वातावरणमे प्रतिकुल असर परल बटैलै । उहाँ कहलै, आब चैत बैशाख आइटा वनुवामे डढेलो लागके मानविय स्वास्थ्यमे असर परठ । यिहीहे नियन्त्रण करलेक लाग सचेतनामुलक कार्यक्रम कैना जरुरी रहलफे उहाँ बटैलै ।
बसन्ता संरक्षित वनके अध्यक्ष पुष्कल बहादुर वम बनुवाहे डढेलोसे बचाइक लाग सामुदयिक वन संगे सरकारी वनहे ध्यान डेहे पर्ना बटैलै ।
घोडाघोडी नगरपालिका–१० के अध्यक्ष भीम बहादुर बम वनुवा बचाइक लाग वडा कार्यालयसे हुइना सहयोग कैना बटैलै । कार्यक्रमके संचालन डिभिजन वन कार्यालयके प्रमुख विश्वराज पंडित ओ स्वागत मन्तव्य शैलेश्वरी सामुदायिक वनके अध्यक्ष गगन कठायत करले रहिट ।