धनगढीहे सुशासन ओ पारदर्शी सेवासहित सुन्दरनगर बनैना

- भल्मन्साहे विकास योजनामे संलग्ना करैना
प्रेमलाल चाैधरी
धनगढी, ९ वैशाख । धनगढी उपहानगरपालिकाके मेयर पदके स्वतन्त्र उम्मेदवार गोपाल हमाल आगामी पाँच वर्षके काम ओ योजनासहित प्रतिवद्धतापत्र जारी करटि धनगढीहे मुलुकके विकसित, सुन्दर ओ नमुना शहर बनैना अपन अलग उद्देश्य रहल ओरसे स्वतन्त्र उम्मेदवारी डेहल बटैले बटैं ।
शुकके रोज धनगढीमे पत्रकार सम्मेलन कैके मेयर पदके स्वतन्त्र उम्मेदवार हमाल अपने उम्मेदवारी घोषणा करलपाछे टमान राजनीतिक दलहुक्रे अपन पार्टीसे उम्मेदवार बन्ना अवसर डेहल बटैलैं । उहाँ अपनहे उम्मेदवारीके अवसर डेना राजनीतिक पार्टीहे कृतज्ञता ओ धन्यवाद व्यक्त करटि कौनो फेन पार्टीके एजेण्डासे मोर लक्ष्य, उद्देश्य फरक रहल ओरसे उहाँहुकनसँग नैमिल्के स्वतन्त्रमे उम्मेदवारी डेहल बटैंलैं । उहाँ अपने मेयरमे जीतपाछे फेन कौनो पार्टीमे नैलागके स्वतन्त्र होके जनताके सेवा करना फेन प्रतिवद्धता व्यक्त करलैं । उहाँ कलैं, “जीटके औरे पार्टीमे जैना कना जनादार हो ।”
“हमार धनगढी, हम्रे बनाब” कना मूलमन्त्रके साथ धनगढी उपमहानगरपालिकाहे भ्रष्टाचारमुक्त, लोककल्याणकारी, स्वच्छ, सुन्दर ओ समृद्ध नमुना शहर बनैना प्रतिवद्धता व्यक्त करटि नगरवासीहे अपनहे आसन्त स्थानीय तहके निर्वाचनमे निर्वाचित कैना अनुरोध करलैं ।
उहाँ निर्वाचनमे मत बदर नाहोए कहिके मतदाता शिक्षाके लाग आ–अपन प्रतिवद्धताके प्रत्याभूति कराइक लाग प्रत्येक वडामे प्रचारप्रसार समिति बनाइल बटैलैं । “जिट हार उ समयके बाट हो,” उहाँ कलैं, “मने नगरवासीहुक्रे महिन यी निर्वाचनमे निर्वाचित करैहि कलेसे अपन प्रतिवद्धताके पूर्ण लागू करम ।” अवसर सिर्जना नैहोके समाजके मानवीय संकट बह्रल ओरसे कृषि, पर्यटनलगायतके अवसर सिर्जना कैना योजना रहल बटैलैं । ओस्टेके, धनगढी उपमहानगरपालिकाके टमान गाउँमे रहल भल्मन्साहुकनहे विकास योजनामे संलग्न कराइक लाग पहुँच सिर्जना कैना बटैलैं । उहाँ कलैं, “गाउँमे टमान काम भल्मन्साके नेतृत्वमे हुइठ, मने सरकार उहाँ हुकनहे विकासके योजनामे अवसर नैहो डेले, मै उहाँहुकनहे विकास योजनामे पहुँच पुगैम ।”
हमाल यीआघे फेन मेयरमे विजयी हुइलेसे कौनो फेन मेरिक सुविधा उपमहानगरपालिकासे नैलेना घोषणा करसेकले बटैं । उहाँ उपमहानगरपालिकाके गाडी फेन नैचह्रना घोषणा करले बटैं ।
उहाँ प्रतिवद्धतापत्रके पहिल बुँदामे भ्रष्टाचार नियन्त्रण सुशासन ओ पारदर्शी सेवा प्रवाह करना उल्लेख करले बटैं । प्रतिवद्धतापत्रमे धनगढी उपमहानगरपालिका तथा वडा कार्यालयहे भ्रष्टाचारमुक्त बनैना, पालिकामे रहल हालसमके पेश्की तथा बेरुजु रकम असुल उपर कैके बेरुजुहे शून्य करना, विकास निर्माणके कार्य संचालन करेबेर उपभोक्ता समिति गठनमे वास्तविक उपभोक्ताहे प्रोत्साहित ओ सहभागी करैना कहल बा । ओस्टेक, विकास बजेट खर्च हुइ नैसक्नक परिपाटीके अन्त्य कैके हरेक आर्थिक वर्षमे विकास बजेट पूणरुपसे खर्च हुइना व्यवस्था करना, कार्यालय प्रशासन सुधार कैके जनताहे चुस्तदरूस्त सेवा सुविधा प्रदान कैना कर्मचारीहुकनहे तालिम, दण्ड ओ पुरस्कारके व्यवस्था करना, तालिम, सेमिनार आदिके नाउँमे हुइटिठरहल उपलब्धीबिहीन खर्चहे व्यवस्थित कैके प्रत्यक्ष रूपमे उपयोगी उत्पादनशील हुइना व्यवस्थापन करना, पालिका तथा वडासे प्रदान करना सेवाहे डिजिटलाइजेसन करना, अव्यवस्थित बसोबास तथा ऐलानी जग्गाके तथ्यांकहे डिजिटलाइजेसन कैके हलिसे हलि लालपूर्जा वितरण करना विशेष महत्वके साथ समन्वय करना जनाइल बा ।
ओस्टेक, शिक्षाओर कैलाली बहुमुखी क्याम्पस, फूलवारी बहुमुखी क्याम्पस, ऐश्वयं बहुमुखी क्याम्पस लगायत नगरके सक्कु सामुदायिक क्याम्पसके पूर्वाधार विकासलगायत शैक्षिक विकासके लाग विशेष महत्वके साथ कार्यक्रम सञ्चालन करना, उपमहानगरपालिकाके बजेटमे शिक्षाहे उच्च प्राथमिकता डेके सामुदायिक विद्यालयके भौतिक पूर्वाधार स्तरोन्नति करना प्रतिवद्धतापत्रमे मेयरके उम्मेदवार उल्लेख करले बटैं ।
ओस्टेक, सामुदायिक विद्यालयके प्रधानाध्यापक तथा शिक्षकहुकनहे कार्यदक्षता ओ कार्यसम्पादनके आधारमे पुरस्कृत कैना मेरिक शिक्षा सुधारके लाग उत्प्रेरित करना, विद्यालयमे प्राविधिक शिक्षाहे प्राथमिकता डेना ओ नयाँ प्राविधिक विषय थप करना, सामुदायिक विद्यालयमे बालमैत्री मन्टेश्वरी विधिसे अध्यापन करैना व्यवस्था मिलैना, सामुदायिक विद्यालयमे नैतिक शिक्षा, खेलकद, योग, गीत–संगीत, चित्रकला आदिमे विशेष जोड डेना, रोजगारमूलक तथा उद्यमशील बन्ना मेरिक शिक्षाहे व्यावहारिक, रोजगारीमूलक बनैना प्रयत्न करना, समाजमे विकृतिके रूपमे रहल लागुपदार्थ तथा दुव्र्यसनीके समस्या न्यूनीकरणमे नगरमे रहल टमान युवा क्लवसँग समन्वय कैके टमान मेरिक रचनात्मक कार्यक्रम संचालनमे नन्ना प्रतिवद्धतापत्रमे उल्लेख बा ।
स्वास्थ्यओर दीर्घरोगी जस्टे क्यान्सर, मृगौला, कलेजो, मुटु रोगी जैसिन जटिल बिरामीके उपचारमे उपमहानगरपालिकासे विशेष सहयोग करना व्यवस्था करनाके साथ सक्कु वडामे निःशुल्क स्वास्थ्य परीक्षणके व्यवस्था करना प्रतिवद्धता व्यक्त करले बटैं । ओस्टेक, स्वास्थ्य बीमा कार्यक्रमहे प्रभावकारी बनैना, ज्येष्ठ नागरिक तथा मातृशिशुके स्वास्थ्यहे महत्वके साथ प्रत्येक वडामे घुम्ती विशेषज्ञ सेवा प्रदान करना व्यवस्था मिलैना, उपमहानगरके सक्कु वडामे शुद्ध, सफा ओ स्वच्छ खानेपानीके व्यवस्थाके लाग पहल करना, रहेक स्वास्थ्यचौकी तथा अस्पतालके स्तरवृद्धि कैके सेवाहे चुस्तदुरुस्त ओ प्रभावकारी बनैना प्रतिवद्धता व्यक्त करले बटैं ।
ओस्टेक, सामाजिक सुरक्षा कार्यक्रम अन्तर्गत वृद्धभत्ता सेवाग्राहीके खातामे जम्मा हुइना अथवा घरमे पुगैना व्यवस्था कैके बैंकमे लाइन लागेपरना भन्झटहा व्यवस्थाके अन्त्य करना, एयरपोर्ट तथा अन्य विकास निर्माणके कार्य करेबेर सरकारसे अधिग्रहण करना जग्गाके मूल्यांकन करेबेर बजार मूल्यसे कम नैहुइना मेरिक व्यवस्थाके लाग प्रयास करना, उपमहानगरपालिकामे कृषि, शिक्षा, स्वास्थ्य, पर्यटन, रोजगारी जैसिन क्षेत्रमे उल्लेख्य योगदान डेना व्यक्तित्वहुकनहे ‘धनगढी तारा’ पदकसे सम्मान करना, अनाथ, असहाय बालबालिका तथा अशक्त जेष्ठ नागरिकहुकनके व्यवस्थापनके सक्कु जिम्मेवारी उपमहानगरपालिका लेना व्यवस्था मिलैना प्रतिवद्धतापत्रमे उल्लेख बा ।
ओस्टेक, थारु तथा राना समुदायके भलमन्सा प्रथाहे कानुनी वैधता प्रदान करना ओ विकास निर्माणके कार्यमे भलमन्साहुकनहे सहभागी करैना, महिला सशक्तीकरणके कार्यक्रम सञ्चालन कैके सामुहिकरूपमे महिलाहुकनहे उद्यमशील कार्यमे संलग्न करैना कार्यक्रम तत्काल लागू करना, अपांगता, दलित, अल्पसंख्यक, जनजाति, विपन्न वर्ग उत्थानके लाग सीपमूलक तालिम प्रदान कैके स्वरोजगार बनैना मेरिक योजना कार्यान्वयन करना, प्रत्येक वडामे १/१ ठो सामुदायिक भवन निर्माण करना, थारू तथा रानाथारु समुदायके संस्कृति एवं देउथानके संरक्षण तथा संवद्र्धन करनाके साथे समुदायके ११/११ जहन सम्पर्क अधिकारी बनाके विकास निर्माणमे सहभागी बनैना प्रतिवद्धता व्यक्त करलैं ।
कृषि पर्यटन व्यापार व्यवसाय रोजगारी प्रवद्र्धनओर उपमहानगरमे एक वडा एक उत्पादन कार्यक्रमहे लागू कैके कृषिमे आधुनिकीकरण तथा व्यावसायीकरण करना, समयमे मल, बीउ आपूर्ति सुनिश्चिता करना, वार्षिक तीन बाली उत्पादन कार्यक्रम लागू कैके गोहुँ पाछे मुग खेती लगैना व्यवस्था मिलाके किसानहुकनके आम्दानी वृद्धि करना कार्यक्रम लागू करना, कषि उपजके विक्री वितरण व्यवस्थित करनाके साथे थोक तथा खुद्रा कृषि हाट बजारके व्यवस्था करना, शीतगृह निर्माणके लाग पहल करना प्रतिवद्धता करलैं ।
ओस्टेक, फोजन उद्योग तथा आधुनिक बधशाला निर्माण करना, कृषिमे सिंचाईके महत्वहे मुख्य प्राथमिकता डेके किसानहुकनके आयआर्जन बह्रैना भूमिगत सिंचाई, ग्रामीण विद्युतीकरण अन्तर्गत सिंचाइके सुविधा नन्ना, माछामासु उत्पादन करना कृषकहुकनके आयवृद्धिके लाग पशुपंक्षी व्यवसायीसंग पीपीपी मोडेलमे मासमच्छरी उत्पादन तथा व्यवस्थापन करना, छाडा गैयनहे व्यावसायिक रूपमे व्यवस्थापन करना कार्यहे उच्च महत्व डेना, नगरमे उद्योग सञ्चालन करना विशेष सहुलियत प्रदान करना, प्रत्येक वडामे कृषि प्राविधिक सेवा पुगैना व्यवस्था करना, कृषि एप निर्माण कैके कृषकके उत्पादनके बजार पहुँच सुनिश्चितता करना, एग्रो फरेष्ट्रीके अवधारणा लागू कैके किसानके आयआर्जन वृद्धि करना, खुद्रा तथा फुटपाथ व्यवसायीके लाग मुख्य बजारलग्गे ठाउँ उपलब्ध कराके उचित व्यवस्थापन करना प्रतिवद्धतापत्रमे उल्लेख करल बा ।
ओस्टेक, पर्यावरण तथा स्वच्छ, सफा धनगढी बनाइक लाग शहरके फोहरमैला व्यवस्थापनके लाग वैज्ञानिक विधि अपनैना, वृक्षरोपणहे विशेष महत्व डेके धनगढी उपमहानगरपालिकाहे हराभरा सुन्दर बनैना, निजी ओ सरकारी पहलमे शौचालय तथा रेष्टुरेन्ट सहितके पार्किंड सुविधाके व्यवस्था करना, सार्वजनिक जग्गाके पहिचान कैके उहाँ बाल उद्यान, ज्येष्ठ नागरिक आनन्दालय, खेलमैदान बनैना, खोलानालाके अतिक्रमण हटाके ग्रिन बेल्ट जगिङ साइट तथा साइकल लेन बनैना, पर्यावरणीय सुधारके लाग उपमहानगरपालिकामे प्लाष्टिक प्रयोगहे न्यूनीकरण करना उहाँ प्रतिवद्धतापत्रमे उल्लेख बा ।
योजनाबद्ध पूर्वाधार विकासके लाग धनगढी उपमहानगरपालिके बासिन्दा भोग्टि आइल डुबान समस्याहे मुख्य समस्याके रूपमे ग्रहण कैके ओकर दिगो समाधान करना, धनगढी नगरके जीर्ण अवस्थामे रहल क्याम्पस चोकसे लेके चौराहसमके मूल सडक कालोपत्र करना कार्यहे विशेष प्राथमिकता डेजैना उहाँ प्रतिवद्धता व्यक्त करलैं । ओस्टेक, उपमहानगरपालिकाके अल्पकालीन, मध्यकालीन ओ दीर्घकालीन गुरुयोजना बनाके पहुँचके आधारमे नैहोके आवश्यकता ओ प्राथमिकताके आधारमे विकास योजना सञ्चालन करना, नदी नियन्त्रणके लाग प्रदेश तथा संघीय सरकारसंग समन्वय कैके तटबन्धके कार्यक्रम तदारुकताके साथ लागू करना, बेहडाबाबा मन्दिर, जोखर ताल, शिवपुरी धाम, नेतुवा ताल लगायतके अन्य सक्कु धार्मिक तथा पर्यटकीय क्षेत्रके गुरुयोजना बनाके ओकर संरक्षण ओ विकास करना, निर्माणाधीन परियोजनाहे समयमे पूरा करैना, सडक लगायत अन्य टमान पूर्वाधार निर्माण करेबेर निर्धारित मापदण्ड अनुसार सडकके क्षेत्राधिकार नैघटैना, धनगढी नगरके स्थानीय यातायातमे महत्वपूर्ण भूमिका रहल स्वरोजगार अटोरिक्सा ओ टेम्पो व्यवसायीहे व्यवस्थित कैके चार्जिंग सहितके पार्किंक स्थल निर्माण करना व्यवस्था करना प्रतिवद्धता व्यक्त करले बटैं ।
ओस्टेके, यी नगरमे रहल महत्वपूर्ण बेहडाबाबा मन्दिरमे अइना भारतीय श्रद्धालुहुकनहे ध्यानमे ढैके भारतीय पर्यटक मन्दिरसम पुग्न सडक तथा शिवगंगा नदीमे पुल निर्माणहे मुख्य प्राथमिकतामे ढैके स्थानीय आयआर्जनमे टेवा पुगैना, टमान नदी नालामे निर्माण हुइना बाँकी स्थानमे पुल निर्माण कार्यहे तत्काल प्राथमिकतामे ढैना, ओ धनगढी नगरभित्तर टेलिफोन सुविधा नैपुगल स्थानमे टेलिफोन सेवा पुगैना उहाँ प्रतिवद्धता व्यक्त करले बटैं ।
ओस्टेक, धनगढी उपमहानगरपालिकाके मेयरके उम्मेदवार हमाल नगरवासीके भलाईके लाग अपन विवेकसे जानटसम इमान्दारीपूर्वक अहोरात्र खटके सेवामे समर्पित हुइना ओ सेवाके अवसर प्रदान करना कना विश्वस्त फेन व्यक्त करलैं ।
