मनोनयन दर्तामे उत्साह नैडेखगिल

कौनो पालिकामे शुन्य, काहु न्यून दर्ता

पहुरा समाचारदाता
धनगढी, ११ बैशाख । निर्वाचन आयोगसे तोकल तालिका अनुसार पहिल रोज अँटवारके कैलाली जिल्लामे मनोनयन दर्ता कैनामे खासे उत्साह नैडेखगिल हो । १३ स्थानीय पालिका रहल कैलाली जिल्लामे कहु उम्मेदवारी शुन्य रहल कलेसे कहु न्यून मात्रमे परल डेखगिल बा ।

धनगढी उपमहानगरपालिकाके मेयर पदमे स्वतन्त्र उम्मेदवार गोपाल हमाल सकारे बाजागाँजासहिट अपने उम्मेदवारी दर्ता करैलै । हुकानसंगै धनगढी उपमहानगरपालिका वडा नम्बर ४ के अध्यक्षमे सिद्धराज पनेरु, वडा नम्बर ५ मे पदमराज भट्ट, वडा नम्बर १४ मे यम लामिछाने ओ वडा नम्बर १५ मे कमलबहादुर ढाटफे स्वतन्त्र उम्मेदवारीके लाग मनोनयन दर्ता करसेकल बटै ।

ओस्टेक धनगढी उपमहानगरपालिकाके मेयर पदमे लोकतान्त्रिक समाजवादी पार्टीसे वसन्त बहादुर विश्वकर्माफे उम्मेदवारी परल बा ।

कैलारी गाउँपालिकाके अध्यक्षमे राष्ट्रिय प्रजातन्त्र पार्टीके होमबहादुर गुरुङ ओ उपाध्यक्षमे पिंगला थारुके उम्मेदवारी परल निर्वाचन अधिकृत कृष्णप्रसाद नेपाल जानकारी डेलैं । गोदावरी नगरपालिका वडा नम्बर ८ के वडाध्यक्षमे नेपाल लोकतान्त्रिक पार्टीसे बाबुराम चौधरी, वडा नम्बर १ के वडाध्यक्षमे स्वतन्त्र उम्मेदवार कृतबहादुर चन्दके उम्मेदवारी परल निर्वाचन अधिकृत राजेन्द्रसिंह भण्डारी बटैलैं ।

गौरीगंगा नगरपालिकाके वडा नम्बर ७ मे नरबहादुर कामी ओ वडा नम्बर ९ मे आशिष सिंह स्वतन्त्र वडाध्यक्षमे उम्मेदवारी परल निर्वाचन अधिकृत निराजन पाण्डे जनैलैं । घोडाघोडी नगरपालिकामे नागरिक उन्मुक्ति पार्टीसे मेयरमे प्रेम चौधरी ओ उपमेयर कलौटीदेवी चौधरी, नेपाल लोकतान्त्रिक पार्टी मनोज लोहारके उम्मेदवारी परल बा । ओस्टेक वडा नम्बर २ के वडाध्यक्षके नेकपा मालेसे टेकबहादुर बम, वडा नम्बर ४ के वडाध्यक्षमे स्वतन्त्र नाराद न्यौपाने, वडा नम्बर ८ वडाध्यक्षके नेकपा मालेसे बलबहादुर विश्वकर्मा, वडा नम्बर १० के वडाध्यक्षमे जसपासे चन्द्रबहादुर चौधरी, राष्ट्रिय जनमोर्चासे जगतप्रसाद जोशी, नारायणप्रसाद भण्डारी स्वतन्त्र उम्मेदवारी डेले बटैं । ओस्टेक, वडा नम्बर ११ के वडाध्यक्षमे जसपासे दानसिंह जोगी, १२ मे नागरिक उन्मुक्ति पार्टीसे कन्हैनालाल चौधरी वडाध्यक्षमे उम्मेदवारी परल बा । ओस्टेक, वडा सदस्यमे ८ जनहके उम्मेदवारी दर्ता हुइल निर्वाचन अधिकृत भानदेव जोशी जानकारी करैलैं ।

टीकापुर नगरपालिकाके मेयरमे नागरिक उन्मुक्ति पार्टीसे रामलाल डंगौरा, उपमेयरमे उल्कादेवी विश्वकर्मा, स्वतन्त्र मेयर/उपमेयरमे लोकबहादुर बुढा क्षेत्री ओ मायादेवी जैशी उम्मेदवारी डेले बा । ओस्टेक, वडा नम्बर १ से ९ समके वडाध्यक्ष ओ सदस्यहुकनके मनोनय दर्ता प्रक्रियामे रहल निर्वाचन अधिकृत पुष्कर खडका जानकारी डेलैं । जानकारी गाउँपालिकाके अध्यक्षमे नेपाल दलित पार्टीसे कवीर करार, नेपाल मजदुर किसान पार्टीसे गगनबहादुर थापा मगर ओ उपाध्यक्षमे चित्रा रोकामगरके उम्मेदवारी परल बा कलेसे वडा नम्बर २ के वडाध्यक्षमे नेपाल मजदुर किसान पार्टीसे गटबहादुर मगर, वडा नम्बर ४ के वडाध्यक्षमे नेपाल मजदुर किसान पार्टीसे गोवर्धन थापामगर, वडा सदस्य टिकाराम पण्डितके उम्मेदवारी दर्ता हुइल निर्वाचन अधिकृत विश्वदीप बेस्रा जानकारी डेलैं ।

लम्कीचुहा नगरपालिकाके मेयरमे नेपाल लोकतान्त्रिक पार्टीसे देशराम चौधरी, राप्रपासे मेयरमे मदनराज उपाध्याय ओ उपमेयरमे भावना शाह, स्वतन्त्र उपमेयरमे पुष्पा शाहीके उम्मेदवारी परल निर्वाचन अधिकृत हिरालाल चौधरी बटैलैं ।
भजनी नगरपालिकामे ३ जनहके उम्मेदवारी परल निर्वाचन अधिकृत लक्ष्मीनारायण दाहाल बटैलैं कलेसे चुरे गाउँपालिकाके भर केक्रो उम्मेदवारी नैपरल निर्वाचन अधिकृत राइभान कुञ्जेडा बटैलैं ।

पहिल दिन देशभर ३ हजार ५६ के उम्मेदवारी

स्थानीय तहके निर्वाचनमे प्रतिस्पर्धा करना देशभर अँट्वारके रोज ३ हजार ५६ जाने मनोनयन दर्ता करले बटैं ।

३५ हजार २ सय २१ पदके लाग हुइना निर्वाचनमे आयोगसे अँट्वारसे मनोनयन दर्ता सुरु करले रहे । आयोगके अनुसार महानगर, उपमहानगर तथा नगरपालिका प्रमुखमे २ सय १८, उपप्रमुखमे १ सय २, गाउँपालिका अध्यक्षमे १ सय ७२, उपाध्यक्षमे ७५, वडाध्यक्षमे ९ सय २८, वडा सदस्यमे ८ सय ७७, महिला सदस्यमे ३ सय ९६, दलित महिला सदस्यमे २ सय ८८ जहनके मनोनयन दर्ता हुइल बा ।

मनोनयन दर्ता करनामे प्रमुख दलके प्रतिनिधि न्यून बटैं । दलसे उम्मेदवारसमेत टुंगो लगाके सेकले नैहो । सत्ता गठबन्धन ओ नेकपा एमालेबीच प्रतिष्पर्धा हुइना हुइलपाछे किहिनहे उम्मेदवार बनैना कना अन्योल डेखाइल ।

आयोग काल्ह (सोम्मरके) फेन बिहान १० से लेके ५ बजेसम उम्मेदवारी दर्ता करेसेक्ना समय निर्धारण करले बा । निर्वाचन आयोगके अनुसार अँट्वार काठमाडौं महानगरपालिकामे प्रमुख पदमे १७ ओ उपमेयरमे १६ जहनके उम्मेदवारी परल बा ।