अग्नी पीडितहे खाद्यान्न सहयोग
पहुरा समाचारदाता
धनगढी, १२ बैशाख । कैलालीके कैलारी गाउँपालिका वडा नम्बर ७ विपतपुर मुक्तकमैया शिविरके स्थानीयहे खाद्यान्न तथा नगद सहयोग करल बा ।
वडा नम्बर ७ रामपुरके स्थानीयहुक्रे धान, गेहुँ ओ नगद संकलन कैके अग्नी पीडितहे सहयोग करल हुइट । रापुरके भलमन्सा रामलाल चौधरीके अगुवाइमे स्थानीयहुक्रे उक्त खाद्यान्न लगायत नगद संकलन कैके सहयोग करल हुइट ।
भलमन्सा चौधरी १५ क्वीन्टल गहुँ, ५ क्वीन्टल चामल, ७० केजी नोन, आलु, खैना तेल ओ नगद ३ हजार रुपिया विपतपुरके भलमन्सा हिँगुराम चौधरीहे हस्तान्तरण करल बटैलै ।
अँट्वारके हुइल भिषण आगलागीसे विपतपुर पुरे बस्ती जरके नष्ट हुइल बा । दिनके साढे १ बजेसे शुरू हुइल आगलागी साँझ साढे ४ बजे किल नियन्त्रणमे आइल रहे । आगलागीसे ७१ घरधुरीसे बनाइल घर, गोठ पूर्णरुपमे जरके नष्ट हुइल बा । एक्कासि हुइल आगलागीसे स्थानीयवासीके लत्ताकपडा, खाद्यान्न, चौपाया जरके नष्ट हुइल बा ।