थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १३ कुँवार २६४६, बिफे ]
[ वि.सं १३ आश्विन २०७९, बिहीबार ]
[ 29 Sep 2022, Thursday ]

अग्नी पीडित मुक्त कमैयाहे याक नेपालके सहयोग

पहुरा | १५ बैशाख २०७९, बिहीबार
अग्नी पीडित मुक्त कमैयाहे याक नेपालके सहयोग

पहुरा समाचारदाता
धनगढी, १५ बैशाख ।
बिचल्लीमे परल कैलालीके कैलारी गाउँपालिका–७ विपतपुरके अग्नी पीडित मुक्त कमैयाके लाग सहयोग जुटे लागल बा ।

घर, सम्पत्ति, खाद्यान्न, लत्ता कपडा सक्कु जरल पीडित मुक्त कमैयाहुक्रनहे लग्गेक गाउँके स्थानीयसहित सङ्घसंस्थासे सहयोग करे लागल हुइट । छटकपुर बसन्ता ओ रामपुरके गाउँवासी गाउँसे आपन सेक्नासम खाद्यान्न उठाके सहयोग करल हुइट ।

ओस्टके परिवर्तनके लाग कार्यरत यूवा समूह, नेपाल(याक नेपाल)से फेन अग्नी पीडित मुक्त कमैयाहे म्याट ओ झुल लगायत सामग्री सहयोग करले बा । संस्थासे १०० थान म्याट ओ ५० ठो झुल संस्थाके महासचिव हृदय पुजारा ओ कैलारी गाउँपालिकाके योजना शाखा प्रमुख सन्तोष कुमार चौधरी गाउँके भलमन्सा हिँगुराम चौधरीहे हस्तान्तरण करल रहिट ।

सामग्री हस्तान्तरण कैटी महासचिव पुजारा पीडितहुक्रनके आवश्यकताके आधारमे संस्था म्याट ओ झुल लगायत सामग्री हस्तान्तरण करल बटैलै । ओस्टके परियोजना अधिकृत सर्जु चौधरी संस्थासे करल सहयोगसे पीडितहे कुछ सहयोग पुग्ना बटैलै । हस्तान्तरण कार्यक्रममे परियोजना अधिकृत प्रदिप चौधरी लगायतके सहभागिता रहेल रहे ।

ओस्टके, मंगरके फाया नेपालसे प्रति परिवारहे एक/एक ठो पुग्ना मेरके किशोरी किट ७२ सेट, झुल ७२ थान, सोलार लाइट, सेनेटरी प्याड ४३२ प्याकेट सहयोग करले बा ।

कैलाली एकीकृत उत्थान कार्य सञ्जाल (किरण) नेपाल हसुलियासे फेन अग्नी पीडित मुक्त कमैयाहे खाद्यान्न लगायत दैनिक उपभोग्यके वस्तु सहयोग करले बा । उ संस्थासे ३८ बोरा चाउर, तीन पेटी खैना तेल ओ ७५ केजी नोन सहयोग करल हो । संस्थाके अध्यक्ष अमृत चौधरी पीडितहे खाद्यान्न हस्तान्तरण करल रहिट । ओस्टके मोहनपुर, शिवपुर, नारायणपुर, तिघरी गाउँवासीसे गाउँसे खाद्यान्न उठाके सहयोग करल गाउँके भलमन्सा हिँगुराम चौधरी बटैलै ।

खेटुवामे गोहुक लर्वा जराइक लाग लगाइल आगी अँट्वारके विपतपुरके मुक्त कमैयाके घरम सुन्गल रहे । आगलागीसे ७१ घरमे क्षति हुइल बा । ४४ घर पूर्ण रुपमे जरके भुवा बनलबा कलेसे बाँकी २७ घरमे आङ्शिक क्षति हुइल कैलारी गाउँपालिकाके कार्यालय जानकारी डेले बा । ओस्टके, दुईठो पावर टिलर, आठठो डल्लप, १३ ठो डिजल इञ्जिन, ४५ ठो सोलार, एकठो मोटर पम्प, टमान घरमे ढारल नगद १२ लाख रुपियाँ जरके नष्ट हुइल बा ।

ढिउर जैसिन मुक्त कमैया कमाके लावा बरसमे भारतसे आइल रहिट । ओस्टके, थारु समुदायके महिलासे लगैना पुर्खौली गहना जरके नष्ट होके सुन १२ तोला ओ अत्यधिक चाँदी जरल बा । आगलागीसे १२ ठो बरवार सुवर ओ २५ ठो घेँटरु ओ दुईठो गोरु मरल गाउँपालिकाके कार्यालय जनैले बा ।

घरबारविहीन बनल पीडितहे रेडक्रससे ७५ ठो टेन्ट उपलब्ध कराके ओ अन्य संघसंस्थासे फेन सहयोग जुटल कैलारी गाउँपालिकाके सूचना अधिकारी यगम कलेल जानकारी डेलै ।

जनाअवजको टिप्पणीहरू