पुरस्कार रकम नैपैटी चेकके भुक्तानी म्याद ओराइल

नरेन्द्र चौधरी
हसुलिया, १५ बैशाख । कैलालीके कैलारी गाउपालिकास्थित कैलारी स्मार्ट समन्वय क्लवसे खेलाडी तथा रेफ्रिहे डेहल पुरस्कार रकमके चेकके भुक्तानी नइहुइटी म्याद सेकल आरोप लागल बा ।

क्लवके चौथा वार्षिकोत्सवके अवसरमे आयोजित पुरुष फुटबल प्रतियोगिताके विजेता तथा उपविजेता ओ रेफ्रिहे वितरण करल पुरस्कार रकमके चेकके भुक्तानीके लाग अशरा लागेबेर चेकके भुक्तानी म्याद नाघल बटाइल बा ।

क्लवसे कैलारी–३, उत्तरभर्रीमे गैल वर्ष पुष २८ गतेसे माघ ६ गतेसम आयोजना करल फुटवल खेलकुद प्रतियोगितामे वितरण करल एनआईसी एशिया बैंकके शोभा चौधरीके नाउँमे काटल चेकमे २०७८ साल माघ १५ गतेके मितिमे रहल बा ।

फुटवल प्रतियोगिताके विजेताहे एक लाख तथा उपविजेताहे ५० हजार रुपैयाँके पुरस्कार राशीके चेक प्रदान करल रहे । पुरस्कार वितरणके वेला विजेताहे एक लाख तथा उपविजेताहे ५० हजार रुप्याके चेक प्रदान करलमे पाछे उ चेक फिर्ता लेके विजेताहे ५० हजार ओ उपविजेताहे २५ हजार रुप्याके चेक प्रदान करल बटाइल बा ।

रेफ्रि हेमन्त चौधरीके अनुसार चार जाने रेफ्रिहे एकमुष्ट २४ हजार रुप्याके चेक प्रदान करल रहे । उहाँ चेकके भुक्तानीके लाग बैंकमे जाके खातामे रकम नइरहल ओरसे लौटल बटैलै । उहाँ कहलै– बैंक खातामे रकम जम्मा हुइना दिन अशरा लग्नु, मने रकम नइआइल । पाछे चेक भुक्तानीके म्याद ओराइल ।

विजेता टोलीसे पाइल ५० हजार रुपैयाके चेक भुक्तानीके लाग जाके बैंक खातामे रकम नइरहल ओ अब्बे म्याद सेकल खेलाडी रोहित चौधरी बटैलै ।

क्लवसे आयोजना करल प्रतियोगितामे कैलारी गाउँपालिकासे आर्थिक सहयोग करल बताइल रहे । मने, क्लवके सचिव लक्ष्मी दहित गाउँपालिकासे कौनो सहयोग नइपाइल बटैलै ।

उहाँ कहलै– ‘गाउँपालिकाके प्रक्रिया अनुसार क्लवसे कागजात पेस करे नइसेकल कारण आर्थिक सहयोग नइपागिल । यीबारे क्लवके अध्यक्ष ज्ञानबहादुर चौधरीसंग फोन करेबेर उहाँक मोबाइल फोन बन्द रहल बा ।