आगलागी बस्तीमे ओरेक नेपालसे सहयोग

पहुरा समाचारदाता
धनगढी, १६ बैशाख । कैलालीके कैलारी गाउँपालिका–७, विपतपुर बस्तीमे ओरेक नेपाल सहयोग करले बा कलेसे ओ निरन्तर परामर्श डेटी आइल बा ।

गैल वैशाख ११ गते दुपहर आगीलागि हुइलपाछे उ बस्तीके ३८ घर पूर्णरुपमे भुवामे परिणत हुइल बा । कलेसे जम्मु मिलाके ७१ घरमे कहुन कहु क्षति पुगल बा ।

ओरेक नेपालसे शुकके रोज उ बस्तीमे महिलाके लाग मेक्सी पेटीकोट २५०/२५० पिस, पेन्टी ब्रा ३३६/३३६ पिस, सेनेटरी प्याड ५०० पिस, लउण्डीहुकन प्लाजा कुरटी १००/१०० पिस वितरण कैगिल बा । ओस्टेक पुरुषके लाग टिसर्ट हाफपेन्ट ५०/५० पिस, बच्चाके लाग १०० सेट कपरा, जीवनजल ७१ प्याकेट, मिनरल पानी ७१ कार्टुन, गुलकोज ७१ डिब्बा हस्तान्तरण करल ओरेक नेपालके जिल्ला कार्यक्रम अधिकृत गीता चौधरी बटैली । उ सामग्री कैलारी गाउँपालिका–७ नम्बर वडा कार्यालयके सचिव गणेश चौधरीके रोहवारमे गाउँक भल्मन्सा हिंगुराम चौधरीहे हस्तान्तरण करल रहे । ओरेक नेपाल महिलाके क्षेत्रमे काम करटी रहल ओरसे महिलाहुकन ढेर ग्रहयताके साथ लागल कार्यक्रम अधिकृत बटैली ।

ओस्टेक विपतपाछे आइसेक्ना समस्याबारे बुझेक लाग ओरेक नेपालसे उहे ठाउँमे बैठके सामुहिक ओ व्यक्तीगत रुपमे तनाव व्यवस्थापनके लाग निरन्तर परामर्श डेटी आइल सहजकर्ता विष्णु रेग्मी बटैली । उहाँ कहली, घरेम आगीलागल संगे उहाँहुकन सक्कु लत्ताकपराफे जरगिल । छोट–छोट लरकुरिया डाईके ढेर समस्या बा, कोई मसिनावारी हुइल बा कलेसे फेरना कपरा नइहुइन ओरेक नेपालसे समस्या बुझके समाधन करटा ।’ ओरेक नेपालसे स्वास्थ्य समस्या हुइल व्यक्तिहुकनहे गाउँपालिकाके सहकार्यमे धनगढी उपचारके लाग पठाइल उहाँ बटैली ।