थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १३ कुँवार २६४६, बिफे ]
[ वि.सं १३ आश्विन २०७९, बिहीबार ]
[ 29 Sep 2022, Thursday ]

उम्मेदवार घरदैलो अभियानमे

पहुरा | १९ बैशाख २०७९, सोमबार
उम्मेदवार घरदैलो अभियानमे

पहुरा समाचारदाता
हसुलिया, १९ वैशाख ।
निर्वाचनके मिति लच्क्याइटी गैलसंगे उम्मेदवारहुक्रे घरदैलो अभियानहे तिब्र बनैले बटै । यहि वैशाख ३० गते हुइना स्थानीय तहके निर्वाचनके लाग उम्मेदवारहुक्रे चुनाव चिन्हा पाइलपाछे दलहुक्रे मतदाता रिझैना टमान गतिविधि आघे बढाइल हुइट ।

कैलाली जिल्लाके कैलारी गाउँपालिकामे ६ जाने पालिका अध्यक्ष, ७ जाने उपाध्यक्ष सहित जम्मा २ सय २० जाने उम्मेदवार चुनावी मैदानमे उटरल कैलारी गाउँपालिकाके निर्वाचन अधिकृत कृष्णप्रसाद नेपाल बटैलै ।

अध्यक्ष पदके लाग नेपाली काँग्रेसके राजसमझ चौधरी, नेकपा माओवादी केन्द्रके लाजुराज चौधरी, नेकपा एमालेके झुमा देवी चौधरी, राप्रपाके होमबहादुर गुरुङ, नागरिक उन्मुक्ती पाटीके भीष्मराज चौधरी, लोकतान्त्रिक समाजवादी पार्टीके विनोदकुमार चौधरी आधिकारिक चुनाव चिन्हा पाइलपाछे घरदैलो अभियानहे तिब्र बनैले बटै ।

ओस्टेक उपाध्यक्षके नेपाली काँग्रेससे भगवती कुमारी चौधरी, नेकपा माओवादी केन्द्रसे लक्ष्मी सत्गौवाथारु, राप्रपा नेपालसे पिङगला थारु, जनता समाजवादी पार्टीसे फुलमति महतो, नेकपा एमालेसे जालुराम चौधरी, नागरिक उन्मुक्ती पार्टीसे कविता चौधरी ओ स्वतन्त्रसे अनिताकुमारी चौधरी उपाध्यक्ष पदके लाग प्रतिस्पर्धामे उटरल बटै ।

नेपाली काँग्रेसके ओरसे अध्यक्ष पदके उम्मेदवार राजसमझ चौधरी जनतन ठेन एजेन्ड सहिट पुग्टी रहल बटैलै । उहाँ कहलै, गाउँपालिकाहे भ्रष्टाचार विरुद्ध शुन्य सहनशिलता अपनाके सुशासन कायम कैना लगायत एजेण्ड सहिट आघे बह्रल बटी, जनतासे डेहल भरोसासे हमार जित सुनिश्चित बा । गाउँपालिकाहे नमूना बनैना हमार योजना बा ।’

ओस्टेक नेकपा माओवादी केन्द्रसे फेरसे अध्यक्ष पदमे दोहराइल लाजुराज चौधरी जनताके मुल्याङकन अनुसार फेरसे अपने उम्मेदवारी डेहल बटैलै । नेकपा एमालेके झुमा देवी चौधरी, राप्रपाके होमबहादुर गुरुङ, नागरिक उन्मुक्ती पाटीके भीष्मराज चौधरी, लोकतान्त्रिक समाजवादी पार्टीके विनोदकुमार चौधरीफे मतदाता रिझैना घरदैलो अभियानमे जुटल बटै ।

ओस्टेक करके कैलालीके पर्यटकीय रूपमे पहिचान बनाइल टीकापुर नगरपालिकामे निर्वाचनके चहल–पहल बढटी गैल बा । टीकापुर नगरपालिकामे ४७ पदके लाग २ सय ८६ जाने उम्मेदवारी दर्ता कराइल रहिट । निर्वाचन अधिकृतके कार्यालय टीकापुरके अनुसार प्रमुख पदमे १२ जाने ओ उप–प्रमुख पदमे ११ जानेक उम्मेदवारी परल रहे ।

प्रमुख पदमे नौ जाने राजनीतिक दलसे तथा तीन जाने स्वतन्त्र ओ उप–प्रमुखमे नौ जाने राजनीतिक दलसे ओ २ जाने स्वतन्त्र उम्मेदवारी दर्ता करैले रहिट । जौन मन्से नगर प्रमुख पदके उम्मेदवार माओवादी केन्द्रके आशा चौधरी, स्वतन्त्र उम्मेदवार विष्णुप्रसाद ढुंगाना, उपप्रमुखओर स्वतन्त्रओर प्रकाश खड्का उम्मेदवारी फिर्ता लेले बटै ।

टीकापुर नगरपालिकामे नेकपा एमालेसे नगर प्रमुखमे श्याम खत्री ओ उपप्रमुखमे उपमा केसी, नेपाली काँग्रेससे नगर प्रमुखमे नवराज रावल, नेकपा माओवादी केन्द्रसे उपप्रमुखमे खडकबहादुर शाह, नागरिक उन्मुक्ति पार्टीसे प्रमुखमे रामलाल डगौरा थारु ओ उपप्रमुखमे उल्कादेवी विश्वकर्मा चुनावी प्रतिस्पर्धामे रहल बटै ।

ओस्टेक काँग्रेस विपीसे उप–प्रमुखमे मिनादेवी साउँद, जनता समाजवादी पार्टीसे प्रमुखमे धरमबहादुर घर्तिमगर ओ उपप्रमुखमे पिंकी विक, राप्रपासे प्रमुखमे गोविन्द रिमाल ओ उपप्रमुखमे सरस्वती बोहरा, नेपाल लोकतान्त्रिक पार्टीसे प्रमुखमे प्रेमबहादुर चौधरी ओ उप–प्रमुखमे पार्वती चौधरी, संघीय लोकतान्त्रिक मञ्चसे प्रमुखमे गोपाल कर्मी ओ उपप्रमुखमे सुनिता विक, मौलिक जरोकिलो पार्टी नेपालसे प्रमुखमे राजकुमार विष्ट ओ उपप्रमुखमे हीरादेवी थारु फे प्रतिस्पर्धामे रहल बटै ।

आठ वडा रहल टीकापुर नगरपालिकामे २०७४ सालके स्थानीय तहके निर्वाचनमे एमालेके उम्मेदवार तपेन्द्र रावल प्रमुखमे निर्वाचित हुइल रहिट कलेसे उपप्रमुखमे नेपाली काँग्रेसके केशरी विष्ट निर्वाचित हुइल रहिट । थारु बाहुल्य क्षेत्र मानल यी नगरपालिकामे रेश्म चौधरी गोसिनीया रञ्जीता श्रेष्ठ चौधरी नेतृत्वके नागरिक उन्मुक्ति पार्टीसे उम्मेदवारी दर्ता कराइलपाछे दुई भारी दलहे टक्कर डेना डेखल बा ।

चुनावमे होमल उ पार्टीके चौधरी कहठै –‘दुई गठबन्धन हुइलेसेफे यहाँ हमार प्रमुख प्रतिस्पर्धी रहल बटी । हमार नारा, एजेण्डा हमार जित्न आधार रहल बा ।’ दर्ता हुइल चार महिनामे उ पार्टी टीकापुरमे अपन बल्गर पकड बनाई लागल दलहुकनके समीक्षा रहल बा । ‘हम्रे सबसे आघे बटी । हम्रे सक्कु वडा जित्बी कना लग्टी रहल बा’ उहाँ कहलै –‘जातीय विचार, टीकापुर घटना, झुटा मुद्दा लगाके पक्राउ कैना, लाल आयोगके प्रतिवेदन सार्वजनिक करे पर्ना, संविधान संशोधन करैना दबाब डेना, लगायतके मुद्दा ओ एजेन्डा रहल बटै ।’

उहाँ ४२ प्रतिशत थारु समुदाय, १४ प्रतिशत दलित समुदाय, टीकापुर घटना झुठा मुद्दाके पक्षमे रहल कुछ वर्गहुक्रे अपन पार्टीहे समर्थन करल बटैलै । २०७४ सालके निर्वाचनमे चार ठो वडा माओवादी केन्द्र, तीन ठो मधेसी जनअधिकार फोरम (लोकतान्त्रिक) पार्टी ओ एक वडामे नेकपा एमाले विजयी हुूइल रहिट ।

अब्बे वडामे विजयी हुइल तीन वडाके अध्यक्ष अपने पार्टीमे दर्ता हुइल उम्मेदवार रहल चौधरी बटैलै । उहाँक दाबी बा–‘गठबन्धन दल ओ नेकपा एमाले हमार पार्टीसे कमजोर रहल बा ।’

सत्ता गठबन्धनके उम्मेदवार नेपाली काँग्रेसके नेता नवराज रावल भर कौनो दल अपन प्रतिस्पर्धी नइरहल प्रतिक्रिया डेलै । उहाँ कहलै –‘काँग्रेस, नेकपा माओवादी केन्द्र, एकीकृत समाजवादी लगायत पाँच दलिय गठबन्धनके कारण नगरपालिकामे मै बल्गर उम्मेदवार हुँ ।’

नेपाली काँग्रेसके पार्टी सभापति नरेश कुमार खत्री सत्ता गठबन्धनके उम्मेदवार सरल, सहज, नगरवासीसे रुचाइल व्यक्ति रहल ओरसे उहाँहे प्रतिस्पर्धामे कौनो गाह्रो नइरहल बटैलै ।

जनाअवजको टिप्पणीहरू