प्रधानमन्त्री देउवा सुदूरपश्चिम अइना

पहुरा समाचारदाता
धनगढी, २१ वैशाख । आसन्न वैशाख ३० गते हुइना स्थानीय तह निर्वाचन प्रचारप्रसारके लाग नेपाली काँग्रेसके सभापतिसमेत रहल प्रधानमन्त्री शेरबहादुर देउवा देश दौडाहमे निस्करल बटैं ।

मंगरके रोज काँग्रेसके मुख्य सचिव कृष्णप्रसाद पौडेल विज्ञप्ति मार्फत देउवा चुनावी सभाहे सम्बोधन करे देशके टमान ठाउँमे पुग्न जानकारी डेलैं ।

काँग्रेस ओ गठबन्धन जिटाइक लाग देउवासहित पार्टीके शीर्ष नेताहुक्रे टमान स्थानमे हुइना सभाहे सम्बोधन करना पौडेल बटैले बटैं । ओहे अनुसार शेरबहादुर देउवा वैशाख २६ गते कैलाली अइटैं । उहाँ धनगढीमे वरिष्ठ नेता रामचन्द्र पौडेल ओ सहमहामन्त्री फरमुल्लाह मंसुरसहित चुनावी सभाहे सम्बोधन करहि ।

ओस्टेक औरे बिहान उहाँ गृह जिल्ला डडेल्धुरा जैहि । वहाँ फेन देउवासहित नेता पौडेल ओ सहमहामन्त्री बद्री पाण्डे लगायत चुनावी सभाहे सम्बोधन करहि ।