थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १३ कुँवार २६४६, बिफे ]
[ वि.सं १३ आश्विन २०७९, बिहीबार ]
[ 29 Sep 2022, Thursday ]

गोदावरी कांग्रेसके चुनावी रणनीति

पहुरा | २१ बैशाख २०७९, बुधबार
गोदावरी कांग्रेसके चुनावी रणनीति

पहुरा समाचारदाता
धनगढी, २१ वैशाख ।
नेपाली कांग्रेस गोदावरी अपन चुनावी प्रचारहे तिब्रता डेले बा । उम्मेदवारी फिर्ता लेना समयसम रोकल कांग्रेसके चुनावी प्रचार अँटवारसे तिब्र रुपमे आघे बह्रल हो ।

कांग्रेस गोदावरीके नगर सभापती वीरबहादुर चोखाल गठबन्धनके निर्णयके कारण कुछ दिन प्रचार प्रसारमे ढिलाइ हुइल बटैलै । उहाँ अँटवारसे भर नियमित रुपमे चुनाबी प्रचार प्रसारमे लागल बटैलै ।

उहाँक अनुसार कांग्रेससे नगरके टमान वडामे प्रत्येक दिन जैना करके तालिका बनाइल ओ उहे अनुसार वडाके कार्यक्रम संचालन हुइटी बा ।

ओस्टेक करके उहाँ आसन्न निर्वाचनमे कांग्रेस भारी बहुमतके साथ विजयी हुइना दावी करलै । ‘एमालेके पछिल्का ५ वर्षके गतिविधिके कारण जनता वाक्क दिक्क हुसेकल बटै’ उहाँ कहलै ‘पछिल्का ५ वर्षमे एमालेसे विकास बजेटके सट्टा कार्यकर्ता मुखी वजेट विनियोजन करल करल ओरसे जनताहे कांग्रेसके आवस्यकता महशुस हुइल बा ।’

उहाँ कांग्रेस भिटरके आन्तरिक किचलोफे समाप्त हुसेकल ओरसे निर्वाचनमे कांग्रेस सबसे आघे रहल बटैलै । ‘गैल स्थानीय तहके निर्वाचनमे कांग्रेस हरनाके कारण पार्टी भिटरके आन्तरिक द्वन्द्व रहे, आब उ समाप्त हुसेकल’ उहाँ कहलै ‘कांग्रेस जित्न बल्गर आधार पार्टी भिटरके एकता हो ।’

कांग्रेस गोदावरीके नगर प्रवक्ता अशोक राज देवकोटा कांग्रेस जित्न मुख्य आधार नगरवासीके एमालेप्रतिके बितिष्णा रहल बटैलै । उहाँ चुनावी प्रचारके दुई दिनसे नगरमे कांग्रेसके माहोल कैसिन बा कना स्पष्ट पारल ओ उहे कारण कांग्रेस बहुमतके साथ जित्न दावी करलै ।

उहाँ गठबन्धनके विषयमे आन्तरिक व्यवस्थापन नइहुके कुछ ढिलाई हुइलेसेफे अब्बे चुनावी प्रचारके अभियानहे तिब्रता डेहल बटैलै । उहाँ चुनावी प्रचारके लाग कांग्रेससे जिम्मेवारी बाँडफाँडके कार्यफे सम्पन्न करसेकल बटैलै ।

‘कुछ दिन ढिलाई हुइलेसेफे चुनावी प्रचार अभियान सुरु हुसेकल बा, टमान समिति गठन करसेकल बटी’ उहाँ कहलै ‘काल्ह ओ आज दुई दिनके चुनावी अभियानसे गठबन्धनके टिम भारी मतके साथ विजयी हुइना विल्गाइठ । चुनावी अभियानमे स्थानीयस्तरसेफे उल्लेख्य उपस्थिति हम्रे भेटल बटी ।’

कांग्रेस हर्नाके मुख्य कारण कांग्रेसभिटरके आपसी द्धन्द रहल बटैटी उहाँ आसन्न निर्वाचनमे उ द्धन्द समाप्त हुसेकल बटैलै ।

‘गैल स्थानीय तहके निर्वाचनमे हम्रे अपने पार्टीके आन्तरिक द्धन्दके कारण पराजित हुइल बटी उहाँ कहलै ‘अत्तरियामे कांग्रेसहे कांग्रेसबाहेक और कोई हराई नइसेकी, अब्बे उ अवस्था नइहो, पार्टीभिटरके आपसी द्धन्द समाप्त हुसेकल अवस्था बा, टबमारे यी बारके निर्वाचनमे कांग्रेस जित्न पक्का बा ।’ उहाँ वडामेफे कांग्रेसके बल्गर प्रतिनिधि निर्वाचनमे होमल ओरसे जित निश्चित रहल बटैलै ।

कांग्रेस गोदावरीमे चुनावहे लक्षित करके दिलिप कुमार साउँदके संयोजकत्वमे युवा परिचालन समिति, बिरबहादुर चोखालके संयोजकत्वमे प्रचार–प्रसार समिति, योगेश भट्टके संयोजकत्वमे आर्थिक संकलन समिति ओ अशोकराज देवकोटाके संयोजकत्वमे सूचना संचार÷यातायात÷सचिवालय समिति गठन करल बा ।

ओस्टेक लक्ष्मी भण्डारीके संयोजकत्वमे महिला परिचालन समिति, धनीराम पनेरुके संयोजकत्वमे भोजन व्यवस्थापन समिति ओ जगत महराके संयोजकत्वमे विद्यार्थी परिचालन समिति गठन करल बा ।

जनाअवजको टिप्पणीहरू