थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १३ कुँवार २६४६, बिफे ]
[ वि.सं १३ आश्विन २०७९, बिहीबार ]
[ 29 Sep 2022, Thursday ]

आगलागी प्रभावितहे खाद्यान्न सहयोग

पहुरा | २१ बैशाख २०७९, बुधबार
आगलागी प्रभावितहे खाद्यान्न सहयोग

पहुरा समाचारदाता
धनगढी, २१ वैशाख ।
बिचल्लीमे परल कैलालीके कैलारी गाउँपालिका–७ विपतपुरके अग्नी पीडित मुक्तकमैयाहे खाद्यान्न सहयोग करल बा ।

घर, सम्पत्ति, खाद्यान्न, लत्ता कपडा सक्कु जरल पीडित मुक्तकमैयाहे छिमेकी गाउँके स्थानीयसहित संघसंस्था सहयोग कैटी रहल बाटै । बुधके धनगढी उपमहानगरपालिका वडा नम्बर ४ उत्तरबेहडीके स्थानीय खाद्यान्न सहयोग करले बाटै ।

गाउँके भलमन्सा जगदीश चौधरीके अगुवाईमे संकलन करल खाद्यान्न सामग्री विपतपुरके भलमन्सा हिँगुराम चौधरीहे हस्तान्तरण करल हो । उत्तरबेहडीके भलमन्सा चौधरी चाउर ७२ बोरा, खैना तेल ७२ पोका ओ चिउरा लगायत खाद्यान्न सामग्री सहयोग करल बटैलै ।

हस्तान्तरण कार्यक्रममे थरुहट नेता लक्ष्मण थारु, गाउँके सचिव बाँधुराम चौधरी लगायतके उपस्थिति रहल रहे ।

खेट्वामे गोहुक लर्वा जराइक लाग लगाइल आगी बैशाख ११ गते विपतपुरके मुक्त कमैयाके घरमे लागल रहे । आगलागीसे ७१ घरमे क्षति हुइल बा । ४४ घर पूर्ण रुपमे जरके भुवा बनल बा कलेसे २७ घरमे आङ्शिक क्षति हुइल कैलारी गाउँपालिकाके कार्यालय जनैले बा ।

ओस्टके, दुईठो पावर टिलर, आठठो डल्लप, १३ ठो डिजल इञ्जिन, ४५ ठो सोलार, एकठो मोटर पम्प, टमान घरमे ढारल नगद १२ लाख रुपियाँ जरके नष्ट हुइल बा । ओस्टके, थारु समुदायके महिलाहुक्रे लगैना पुर्खौली गहना जरके नष्ट होके सुन १२ तोला ओ अत्यधिक चाँदी जरल बा ।

आगलागीसे १२ ठो बरवार सुवर ओ २५ ठो घेँटरु, दुईठो गोरु मरल जनाइल बा । घरबारविहीन बनल पीडितहे रेडक्रससे ७५ ठो टेन्ट उपलब्ध कराइल ओ अन्य संघसंस्थासे फेन सहयोग जुटल बा । ओस्टेक, कैलारी गाउँपालिका–५, गोबरैला निवासी खडकवीर चौधरी आगलागी पीडितहुकनहे एक लाख ४५ रुप्या सहयोग करले बटैं ।

जनाअवजको टिप्पणीहरू