कैलारीमे तीन पुरान उम्मेदवार कडा प्रतिस्पर्धामे

कैलारीमे बिरासत भस्कैटि काँग्रेस, हमार जीत फेरसे सुनिश्चित बाः माओवादी

पहुरा समाचारदाता
हसुलिया, २२ वैशाख । यिहे बैशाख ३० गते हुइना स्थानीय तह निर्वाचनमे कैलाली जिल्लाके कैलारी गाउँपालिकामे पुराने तीन उम्मेदवार फेरसे कडा प्रतिस्पर्धामे रहल बटै ।

२०७४ सालके स्थानीय निर्वाचनमे कैलारी गाउँपालिका अध्यक्ष पदके लाग नेपाली काँग्रेससे राजसमझ चौधरी, नेकपा माओवादी केन्द्रसे लाजुराम चौधरी ओ राप्रपा नेपालसे होमबहादुर गुरुङ प्रतिस्पर्धा रहिट । कलेसे अवसिक निर्वाचनमेफे तिनु उम्मेदवार चुनावी मैदानमे ठरहयाइल बटै ।

२०७४ सालके स्थानीय निर्वाचनमे लाजुराम चौधरी ६ हजार २०४ मत नानके जीत हासिल करल रहिट । उहाँके प्रतिद्वन्द्वी नेपाली कांग्रेसके राजसमझ चौधरी ५ हजार ८८७ मत नानल रहिट । निवर्तमान अध्यक्ष लाजुराम चौधरी ३ सय १७ ढेर नानके विजय हुइल रहिट ।

यी चुनावमेफे माओवादीके लहर चलल ओरसे फेरसे जिटना नेकपा माओबादी केन्द्रके ओरसे अध्यक्ष पदके उम्मेदवार लाजुराम चौधरी बटैठै । निबर्तमान अध्यक्ष चौधरी कहलै– ‘पाँच बरसके अवधिमे कैगिल भौतिक पूर्वाधारके विकास ओ कार्यसम्पादनमे कैलाली गाउँपालिका उत्कृष्ट आइल बा । यी कारणफे फेन हमार जिटना आधार हो ।’

मने ३ सय १७ मतसे केल पराजय भोगल नेपाली काँग्रेस भर अवसिक चुनावमे कैलारी गाउँपालिकामे माओवादीके विरासत भत्कैना दावी करले बा । नेपाली काँग्रेसके ओरसे अध्यक्ष पदके उम्मेदवार राजसमझ चौधरी कहलै,–आघेक निर्वाचनके पार्टीसे कैलारी गाउँपालिका वडा नम्बर ९ मे खेम चौधरीहे आधिकारिक टिकट नइडेहल कारण कुछ मतसे केल पराजय भोगे परल । खेम चौधरी नेपाली काँग्रेससे टिकट नइपैलेसेफे स्वतन्त्र उम्मेदवारी डेके कैलारी–९ से विजय हुइल रहिट । कैलारी–८ सेफे नेपाली काँग्रेससे दुई उम्मेदवारवार हुइल कारण हार व्यहोरे परल ।

उहाँ कहलै अवसिक हमार जिटना आधार यी हो,–‘यी निर्वाचनमे कैलारी गाउँपालिकाके नेपाली काँग्रेस एक ढिक्का हुके चुनावी प्रचार प्रसारमे जुटल बटी । नेकपा माओबादी केन्द्रसे गौरीशंकर चौधरी एमालेमे प्रवेश करले बटै । नेकपा माओवादी केन्द्रके ओरसे वडा अध्यक्ष, वडा सदस्य लगायत ढेर जाने नेपाली काँग्रेसमे प्रवेश करले बटै । २०७४ सालके धनगढी उपमहानगरपालिकाके मेयर पदके उम्मेदवार रामसमझ राना नेपाली काँग्रेसमे प्रवेश करके गदरियाहे अपन कार्य क्षेत्र बनैले बटै । फोरम लोकतान्त्रिक पार्टी अघिल्का चुनावमे अलग्गे चुनाव लरल मने अब्बे नेपाली काँग्रेसके सम्माहित हुइल बा । राष्ट्रिय प्रजातन्त्र पार्टी कमल थापा समुहके कार्यकर्ता नेपाली काँग्रेसमे प्रवेश करले बटै ।’

नेकपा माओवादी नेतृत्वके पाँच बरसे कार्यकालमे पारदर्शिता नइडेखल, कार्यकर्तामुखी अनुदान डेहल कारण जनता आघेक नेतृत्वप्रति रुष्ट डेखल कारण अवसिक चुनावमे कैलारीमे अपनेहुक्रे बाजी मर्ना नेपाली काँग्रेसके ओरसे अध्यक्ष पदके उम्मेदवार राजसमझ बटैलै । यी निर्वाचनमे एकसे ९ वडासम महुल मजा रहल ओ जित सुनिश्चित रहल उहाँ दाबी करलै ।

ओस्टेक करके अघिल्का चुनावमे राप्रपा नेपालसे उम्मेदवार डेहल होमबहादुर गुरुङ टिसरा स्थानमे आइल रहिट । उहाँफे अब्बे कडा प्रतिस्पर्धामे रहल बटै । सक्कुहुनहे समान दुष्टिसे हेरटी रहल कारण मतदाता अपनहे विश्वास कैके विजय करैना उहाँ दाबी करलै ।

ओस्टेक करके कैलारी गाउँपालिका अध्यक्ष पदके लाग नेकपा एमालेके झुमादेवी चौधरी, नागरिक उन्मुक्ती पाटीके भिष्मराज चौधरी, लोकतान्त्रिक समाजवादी पार्टी विनोदकुमार चौधरीफे चुनावी अभियान तिब्र बनैटी निरन्तरण घरदैलो अभियानमे जुटल बटै ।

ओस्टेक उपाध्यक्षके नेपाली काँग्रेससे भगवती कुमारी चौधरी, नेकपा माओवादी केन्द्रसे लक्ष्मी सत्गौवाथारु, राप्रपा नेपालसे पिङगला थारु, जनता समाजवादी पार्टीसे फुलमति महतो, नेकपा एमालेसे जालुराम चौधरी, नागरिक उन्मुक्ती पार्टीसे कविता चौधरी ओ स्वतन्त्रसे अनिताकुमारी चौधरी उपाध्यक्ष पदके लाग प्रतिस्पर्धामे उटरल बटै । नेकपा माओवादी केन्द्रके लक्ष्मी सत्गौवाथारु निबर्तमान उपाध्यक्ष हुइट ।