थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १३ कुँवार २६४६, बिफे ]
[ वि.सं १३ आश्विन २०७९, बिहीबार ]
[ 29 Sep 2022, Thursday ]

निर्वाचन आचारसंहिताबारे छलफल

पहुरा | २४ बैशाख २०७९, शनिबार
निर्वाचन आचारसंहिताबारे छलफल

पहुरा समाचारदाता
धनगढी, २४ वैशाख ।
संवाद समुह धनगढीसे शनिच्चरके रोज निर्वाचन आचारसंहिताबारे संचारकर्मीहुकनसे छलफल करले बा । कार्यक्रममे कैलालीके पत्रकारहुक्रे निर्वाचन आचारसंहिताके पुर्ण पालना करके समाचार संकलन तथा सम्प्रेषण कैना प्रतिबद्धता जनैले बटै ।

पत्रकारहुक्रे निर्वाचनहे स्वच्छ बनैना करके कौनो पक्ष वा विपक्ष हुके समाचार सम्प्रेसण नइकैना, द्वन्द सिर्जना कैना खालके समाचार सम्प्रेषण नइकैना प्रतिबद्धता जनाइल रहिट ।

छलफलमे बोल्टी नेपाल पत्रकार महाँसंघके पुर्व केन्द्रीय सदस्य तथा गोरखापत्र दैनिकके सुदूरपश्चिम प्रदेश संयोजक प्रकाशवित्रम शाह निर्वाचनहे सफल बनैना पत्रकारके महत्वपुर्ण भुमिका हुइना बटैलै । अभिनसम आचारसंहिता विपरितके क्रियाकलाप नइभेटल हो,’ उहाँ कहलै, ओसिन डेखलेसे निर्वाचन आयोगसेफे अनुगमन करे परठ, प्रेस काउन्सिलसे फे ओकर अनुगमन कैना करल बा ।’ उहाँ निर्वाचन अवधिमे पत्रकारहे सहजरुपमे सुचना उपलब्ध करैना व्यवस्था कैना निर्वाचन आयोग ओ मुख्य निर्वाचन अधिकृतके कार्यालयहे आग्रह समेत करले बटै ।

नेपाल पत्रकार महाँसंघ कैलालीके सचिव प्रेम चौधरी सामाजिक सञ्जालमे निर्वाचन आचारसंहिताके उल्लङ्घन हुइना क्रम बढल कहटी उहीहे निगरानी कैना आवश्यक रहल बटैले रहिट । पत्रकारसे आचारसंहिताके उल्लङ्घन करल पैलेसे प्रेस काउन्सिल नेपालमे समेत उजुरी करे सेक्ना बटैलै । कैलालीके सक्कु मिडियाहे आचारसंहिताके दायरामे रहिके समाचार सम्प्रेषण करैना पत्रकार महाँसंघसे महत्वपुर्ण भुमिका खेल्न उहाँ बटैलै ।

कार्यक्रममे बोल्टी निर्वाचन आयोग सुदूरपश्चिम प्रदेशके निमित्त प्रमुख प्रेमराज भट्ट पत्रकारहे सहजरुपमे निर्वाचन सम्बन्धी सूचना डेना अपने कार्यालयमे मिडिया सेन्टर खोले डेना प्रतिबद्धता व्यक्त करलै । कैलालीके प्रमुख जिल्ला अधिकारी किरण थापा निर्वाचनमे पत्रकारहे सहजरुपमे सुचना संकलन कैना पासके व्यवस्था कैना बटैलै । ओकर लाग पत्रकार महासंघ कैलालीसंग आवश्यक समन्वय कैना उहाँ बटैलै ।

कैलालीके प्रमुख निर्वाचन अधिकृत जयानन्द पनेरु पत्रकारहुकनहे सूचना डेना कौना कमि नइकैना बटैलै । उहाँ मतगणना स्थलमेफे पत्रकारहे आवश्यकता अनुसार सूचना संकलन करे जाई डेना बटैलै । ओकर लाग पत्रकार महासंघसंग समन्वय कैना उहाँ बटैलै । प्रमुख निर्वाचन अधिकृत पनेरु जिल्लाभरके सुचना सम्प्रेष्ण करेक लाग भर सक्कु निर्वाचन अधिकृतहे सम्पर्क करे पर्ना बटैलै । ओकर लाग आवश्यक समन्वय कैना अपने तयार रहल उहाँक कहाई बा ।

नेपाल पत्रकार महासंघ कैलालीके अध्यक्ष हिमालय जोशीके अध्यक्षतामे हुइल कार्यक्रममे सहजीकरण कर्ण शाह करले रहिट ।

जनाअवजको टिप्पणीहरू