सामग्री बुझके मतदान केन्द्रमे खटलै कर्मचारी
पहुरा समाचारदाता
धनगढी, २७ बैशाख । शुकके रोज हुइना स्थानीय तह निर्वाचनके लाग मतदान अधिकृतसहितके कर्मचारी मतदान केन्दमे खटल बटै ।
मंगके सकारे जिल्ला निर्वाचन कार्यालय ओ मुख्य निर्वाचन अधिकृतके कार्यालयसे निर्वाचन सामग्री बुझके कार्य क्षेत्रमे नेंगल प्रदेश निर्वाचन कार्यालये निमित्त प्रमुख प्रेमराज भट्ट बटैलै ।
कैलाली जिल्लाके १३ ठो स्थानीय तहमे ६२० मतदान केन्द्र रहल ओ मंगर साँझसम सक्कु मतदान केन्द्रके अधिकृतहुक्रे निर्वाचन सामाग्री बुझके लैगिल मुख्य निर्वाचन अधिकृत जयनन्द पनेरु बटैलै । उहाँ कहलै, बुधके विफेक रोज मतदाता परिचय वितरण कैना, मतदान स्थलके तयारी करही शुक रोज सकारे ७ बजेसे साँझ ५ बजेसम मतदान हुई ।’
मुख्य निर्वाचन अधिकृतके कार्यालयसे मतपत्र ओ निर्वाचन कार्यालयसे निर्वाचनके लाग प्रयोग हुइना ६८ मेरिक सामग्री, मतदाता नामावली, मतदाता परिचय पत्र ओ अनुसूची फारम बुझके नेंगल प्रदेश निर्वाचन कार्यालयके सूचना अधिकारी राजेश चौधरी बटैलै । ५ लाख २५ हजार १२५ मतदाता संख्या रहल कैलाली जिल्लामे २३६ मतदान स्थल ओ ६२० मतदान केन्द्र निर्धारण करल बा ।
कौन पालिकामे कटरा मतदाता, मतदान स्थल ओ मतदान केन्द्र
कैलाली जिल्लाके सदरमुकाम रहल धनगढी उपमहानगरपालिकामे ४५ हजार ९२४ जाने पुरुष, ४७ हजार २२४ महिला ओ ३ जाने अन्य करके ९३ हजार १९१ जाने मतदाता रहल बटै । जहाँ ३४ मतदान स्थल ओ १०४ मतदान केन्द्र निर्धारण हुइल निर्वाचन आयोग जनैले बा ।
कैलारी गाउँपालिकामे १८ हजार २५२ पुरुष, १८ हजार ४८१ महिला, २ अन्य करके ३६ हजार ७३५ जाने मतदाता रहल बटै । जहाँ २० मतदान स्थल, ४७ ठो मतदान केन्द्र रहल बा । गोदावरी नगरपालिकामे २६ हजार ६१७ पुरुष, २८ हजार ८७४ महिला, १ अन्य करके ५५ हजार ४९२ जाने मतदाता रहल बटै । यहाँ मतदान स्थल २४ ओ मतदान केन्द्र ६७ रहल बा ।
गौरीगंगा नगरपालिकामे १९ हजार ७४ पुरुष, २० हजार ९४४ महिला करके ४० हजार १८ जाने मतदाता संख्या रहल बा । यहाँ १७ मतदान स्थल ओ ४३ मतदान केन्द्र रहल बा । घोडाघोडी नगरपालिकामे २५ हजार ३९३ पुरुष, २६ हजार ६४७ महिला करके ५२ हजार ४० जाने मतदाता संख्या रहल बा । यहाँ १७ मतदान स्थल ओ ६० ठो मतदान केन्द्र रहल बा ।
चुरे गाउँपालिकामे ६ हजार २१७ पुरुष, ५ हजार ७०८ महिला करके ११ हजार ९२३ मतदाता संख्या रहल बा । यहाँ १४ ठो मतदान स्थल ओ २० ठो मतदान केन्द्र रहल बा । जानकी गाउँपालिकामे १७ हजार २१० पुरुष, १८ हजार १९६ महिला करके ३५ हजार ४ सय ६ जाने मतदाता संख्या रहल बा । यहाँ २० ठो मतदान स्थल ओ ४३ ठो मतदान केन्द्र रहल बा ।
जोशीपुर गाउँपालिकामे १२ हजार ५९१ पुरुष, १२ हजार ८५५ महिला करके २५ हजार ४४६ मतदाता संख्या रहल बा । यहाँ १३ ठो मतदान स्थल ओ ३१ ठो मतदान केन्द्र रहल बा । टिकापुर नगरपालिकामे २५ हजार ६४ पुरुष, २७ हजार ८०७ महिला, १ अन्य करके ५२ हजार ८७२ मतदाता संख्या रहल बा । यहाँ १६ ठो मतदान स्थल ओ ५७ ठो मतदान केन्द्र रहल बा । बर्दगोरिया गाउँपालिकामे १० हजार ६९८ पुरुष, ११ हजार ४८४ महिला करके २२ हजार १८१ मतदाता संख्या रहल बा । यहाँ १० ठो मतदान स्थल, २५ ठो मतदान केन्द्र रहल बा ।
भजनी नगरपालिकामे १७ हजार ११९ पुरुष, १६ हजार ८१० महिला, २ अन्य करके ३३ हजार ९३१ मतदाता संख्या रहद बा । यहाँ १८ ठो मतदान स्थल ओ ४३ मतदान केन्द्र रहल बा । मोहन्याल गाउँपालिकामे ६ हजार २४९ पुरुष, ५ हजार ७३५ महिला करके ११ हजार ९८४ मतदाता संख्या रहल बा । यहाँ १५ ठो मतदान स्थल ओ १८ ठो मतदान केन्द्र रहल बा । ओस्टेक करके लम्कीचुहा नगरपालिकामे २६ हजार ६९६ पुरुष ओ २८ सय २४८ महिला, २ अन्य करके ५३ हजार ९४६ मतदाता संख्या रहल बा । यहाँ १८ ठो मतदान स्थल ओ ६१ ठो मतदान केन्द्र निर्धारण हुइल आयोग जनैले बा ।
