बलिउडके चर्चित गायक केके के निधन

काठमाडौं, १८ जेठ । बलिउडके चर्चित गायक कृष्णकुमार कुन्नथके मंगर रात कोलकातामे निधन हुइल बा । उहाँ ५३ वर्षके रहैं । स्टेजमे ’केके’ के नामले परिचित उहाँ मंगरके रोज कोलकाताके एक कलेजके कार्यक्रममे प्रस्तुति डेना क्रममे बिरामी हुइल रहैं ।

भारतीय सञ्चारमाध्यमके अनुसार कन्सर्टलगत्ते उहाँ होटेल लौटल रहैं । होटेलमे उहाँ गिरल ओ लगत्ते अस्पताल लैगिलेसे फेन चिकित्सक मृत घोषित करल बीबीसी हिन्दी जनैले बा ।

अस्पताल पुगल पश्चिम बंगाल सरकारके ऊर्जामन्त्री अरुप विश्वासके अनुसार चिकित्सकहुक्रे केकेके निधन हृदयघातसे हुइ सेक्ना प्रारम्भिक अनुमान करले बटैं ।

तमिल, तेलुगु, कन्नड, मराठी, बांग्ला ओ गुजराती चलचित्रमे टमान गीत गाके केके कोलकातास्थित गुरुदास कलेजके कार्यक्रममे भाग लेहे आइल रहैं । निधनसे आगे उहाँक इन्स्टाग्राम पेजमे कोलकाता अडिटोरियममे आयोजित कन्सर्टके भिडियो ओ तस्बिर पोस्ट हुइल रहे ।

सन् १९९६ से गायनमे करिअर सुरु करल उहाँक पहिल एल्बम ‘पल’ सन् १९९९ मे सार्वजनिक हुइल रहे । चलचित्रमे भर सलमान खान, ऐश्वर्या राय ओ अजय देवगन अभिनित ‘हम दिल दे चुके सनम’ से गायन यात्रा सुरु करले रहैं । ‘तडप तडप’ से अपनहे अब्बल गायकके रूपमे सावित करल केकेहे ओकरबाद पाछे हेरे नैपरल ।

केकेके निधनमे भारतीय प्रधानमन्त्री नरेन्द्र मोदी दुःख व्यक्त करले बटैं । मोदी सामाजिक सञ्जालमे लिख्ले बटैं, “केकेके आकस्मिक निधनले दुःखी बटु । उहाँक गीतमे अलग–अलग भावना डेखाए । उहाँक गीतले हरेक उमेरके मनैन्के मन छुए । उहाँहे उहाँक गीतमार्फत समझजाइ । परिवार ओ प्रशंसकप्रति मै समवेदना प्रकट करटु ।” ओस्टेक बलिउडके अन्य कलाकार समेत उहाँक निधनके दुःख व्यक्त करले बटैं । केकेके गोसिनिया, एक छावा ओ एक छाइ बटिन । छावा नकुल ओ छाइ तमारा फेन सांगीतिक क्षेत्रमे सक्रिय बटैं ।

केकेके चर्चित १० गीत

१. तु जो मिला, बजरंगी भाइजान

२.अजब सी, ओम शान्ति ओम

३.क्या मुझे प्यार है, वो लम्हे

४. हमको प्यार हुवा, रेडी

५.पल, पल एल्बम

६.दिल क्यों येह मेरा, काइट्स

७. लबों को, भूल भुलैया

८.बीते लम्हें, द ट्रेन

९.तडप तडप, हम दिल दे चुके सनम

१०.दस बहाने, दस