विकास निर्माण योजनाके अनुगमन

पहुरा समाचारदाता
हसुलिया, १७ असार । कैलालीके कैलारी गाउँपालिकामे विकास निर्माण सम्पन्न योजनाके गाउँपालिका स्तरीय अनुगमन समुहसे अनुगमन करले बा ।

गाउँपालिका उपाध्यक्ष तथा अनुगमन समिति संयोजक भगवतीकुमारी चौधरी सहित प्राविधिक टोली शुकके योजनाके स्थलगत अनुगमन करल हो । गाउँपालिका स्तरीय अनुगमन समुहसे आर्थिक वर्ष २०७८÷७९ के बजेटसे पालिकाके टमान वडामे सञ्चालित निर्माणाधीन योजनाके गुणस्तर रहल÷नइरहल बारेमे अनुगमन करल समिति संयोजक भगवतीकुमारी चौधरी बटैलै ।

गाउँपालिका स्तरीय अनुगमन समुहसे कैलारी गाउँपालिका वडा नम्बर ८ पृथ्वीपुरमे रहल कर्मशिल महिला बहुउद्देश्यीय सहकारी संस्था लिमिटेडमे स्थापना हुइल गारमेन्ट उद्योगके अनुगमन करले बा । यकर लाग एक सहकारी एक उद्योग स्थापना करेक लाग कृषि सहकारी कार्यक्रम अन्र्तगत गाउँपालिकासे १० लाख ओ १० लाख सहकारीके बजेटसे गारमेन्ट उद्योग हुइल बा ।

कैलारी गाउँपालिका–८ कुट्टी टोलमे रहल रामजानकी मन्दिरके धर्मशाला भवन निर्माणके अनुगमन करल बा । गाउँपालिकासे धर्मशाला भवन निर्माणके लाग ९ लाख ५० हजार बजेट विनियोजना हुइल रहे ।

ओस्टेक अनुगमन समुहसे शिवशक्ति आधारभूत विद्यालय बन्दकद्रीके गेट, पर्खाल निर्माणके अनुगमन करले बा । विद्यालयके गेट, पर्खाल निर्माणके लाग प्रदेश पूर्वाधार विकास कार्यक्रम अन्र्तगत क्षेत्र नम्बर ५ से १९ लाख ५० हजार बजेट छुटयाइल समुहके सदस्य सचिव तथा योजना शाखा प्रमुृख सन्तोषकुमार चौधरी बटैलै ।

निर्माण हुइल योजनाके काम सन्तोषजनक रहल उपाध्यक्ष भगवतीकुमारी चौधरी बटैलै । अनुगमन टोलीमे समुहके संयोजक भगवतीकुमारी चौधरी, समुहके सदस्य सचिव तथा योजना शाखा प्रमुृख सन्तोषकुमार चौधरी, कृषि शाखा प्रमुख मैयाकुमारी चौधरी, खेमराज चौधरी, प्राविधिक सव–इन्जिनियर निर्मलकुमार चौधरी लगागतके सहभागिता रहे ।