सुदूरपश्चिममे कोरोना संक्रमणके ग्राफ उप्पर
पहुरा समाचारदाता
धनगढी, २१ सावन । सुदूरपश्चिम प्रदेशमे कोरोना सङ्क्रमण फेनसे बह्रे लागल बा ।
भारतसे नेपाल अउइयानमे पाछेक समय संक्रमण डेख परे लागलपाछे प्रदेशमे कोरोनाके ग्राफ उप्पर लागल हो । प्रदेशमे सावन महिना लागलसँगे तीन जनहनमे कोरोना संक्रमण पुष्टी हुइलमे सावन १९ गतेसम ६१ जनहनमे संक्रमण डेखल रहे । असार मसान्तसम इ संख्या एक अंकमे सीमित रहे । अब्बे भारतसे अउइयनमे संक्रमण बह्रलसँगे समुदायमे फेन संक्रमण डेखे लागल हो । गौरीफन्टा सीमा क्षेत्रमे खटल स्वास्थ्यकर्मी गणेश साउँद भारतसे आइल ८० प्रतिशत नागरिकके किल कोरोना परिक्षण हुइना करल बटैलै । उहाँ अब्बे कोरोनाके संक्रमण दर बह्रल डेखल बटैटी परिक्षणदर बह्राइल बटैलै ।
भारतसे आइल ८० प्रतिशतमे १० प्रतिशतमा कोरोनाके संक्रमण डेखल बटैलै । प्रदेश स्वास्थ्य निर्देशनालयके अनुसार हाल प्रदेशमे सक्रिय संक्रमितके संख्या ७५ पुगल बा । सावन डुसरा अँठ्वार संक्रमण दोहोरो अंकमे उप्पर लागल रहे । पाछेक तीन दिनमे लगातार दैनिक ५० से ढिउर संक्रमण डेखल बा । संक्रमण डेखलपाछे सिमानाकामे कडाइ करल प्रदेश सामाजिक विकास मन्त्री गोविन्दराज बोहरा बटैलै । संक्रमण बह्रे लागलसँगे यहाँ साढे ५ महिना पाछे एक जाने संक्रमितके मृत्यु हुइल बा ।
शुकके सकारे सेती प्रादेशिक अस्पतालमे उपचाररत कञ्चनपुरके भीमदत्त नगरपालिका–६ के ५० वर्षीय संक्रमितके मृत्यु हुइल हो । अस्पतालके सूचना अधिकारी दिलीप कुमार श्रेष्ठके अनुसार बिफेक रोज ‘अल्कोहोलिक हेपाटाइटिस’के समस्या डेखलपाछे उहाँ सेतीके साधारण वार्डमे भर्ना हुइल रहिट । कोरोना परीक्षण करेबर रातके संक्रमण पुष्टि हुइल ओ सकारे ८ बजे मृत्यु हुइल श्रेष्ठ बटैलै । मृतक इहीसे आघे कोरोनाविरुद्धके खोप नैलगाइल पाइल बा ।
