आघेक दिनके तुलनामे दोब्बर बृद्धि

पहुरा समाचारदाता
धनगढी, २४ सावन । सुदूरपश्चिम प्रदेशमे कोरोना संक्रमण दोब्बर बृद्धि हुइल डेखल बा ।

स्वास्थ्य निर्देशनालयसे डेहल जानकारी अनुसार अँटवारके रोज ५४ जाने लौव सक्रमित ठप्लेसेफे सोम्मार ओकर डबलसे ढेर १२१ जाने लौवा संक्रमित ठपल बटै । रोजना ठप्ना संक्रमितमे ढेर संख्या भारतके अउइयामे डेखल बा ।

अँटवारके रोज सुदूरपश्चिम प्रदेश टमान नाकासे ६ सय ७१ जाने नेपाल प्रवेश करल मन्से ३७ जनहनमे संक्रमण डेखल रहे । कलेसे सोम्मारके रोग सुदूरपश्चिमके टमान नाका हुइटी प्रवेश करुइया ९ सय ५३ जाने मन्से ५१ जनहनमे कोरोना संक्रमण पुष्टि हुइल बा ।

कोरोना संक्रमणदर ह्वाटे बह्रलपाछे सुदूरपश्चिम प्रदेशमे कोरोनाके सक्रिय संक्रमितके संख्या ४२३ जाने पुगल निर्देशनालय जनैले बा ।

ओस्टेक देशभर पछिल्का २४ घण्टामे थप ९३४ जनहनमे कोरोना संक्रमण पुष्टि हुइल बा कलेसे एक जानेक मृत्यु हुइल बा ।

स्वास्थ्य तथा जनसंख्या मन्त्रालयके अनुसार ५ हजार ३५१ जानेक परीक्षणमे ९३४ जनहनमे संक्रमण पुष्टि हुइल हो । स्वास्थ्य मन्त्रालयके अनुसार २ हजार ८६२ जानेक पीसीआर परीक्षण करेबेर ४९८ जाने ओ २ हजार ४८९ जानेक एन्टिजेन परीक्षण करेबेर ४३६ जानेक संक्रमण डेखल मन्त्रालयके कहाई बा ।

यी संगे कोरोना भाइरसके सक्रिय संक्रमितके संख्या ५ हजार ६८६ पुगल बा । पछिल्का २४ घण्टामे ४७० जाने संक्रमणमुक्त हुइल बटै ।

जेम्ने ५ हजार ५०९ जाने होम आइसोलेसनमे रहल बटै कलेसे १७७ जाने संस्थागत आइसोलेसन ओ ४७ जाने आईसीयूमे बटै ।

ओस्टेक ३ जानेक भेन्टिलेरमे धारके उपचार हुइटी रहल मन्त्रालय जनैले बा । सोम्मार थपलसंगे नेपालमे कोरोना संक्रमितके कुल संख्या ११ लाख ३५ हजार ६७२ पुगल बा ।

ओस्टेक १० वर्ष टरेक १० जाने बालबालिकामे कोरोना संक्रमण डेखल बा कलेसे ११ से २० वर्ष उमेर समूहके ४३ जनहनमे कोरोना संक्रमित हुइल स्वास्थ्य तथा जनसंख्या मन्त्रालय जनैले बा ।

दैनिक संक्रमित ८ हजार पुगे सेक्ठैः स्वास्थ्य मन्त्रालय

स्वास्थ्य मन्त्रालयसे कोरोना महामारीके चौठो लहर नेपालमे अभिन एक महिना रहना निष्कर्ष निकरले बा ।

स्वास्थ्य तथा जनसंख्या मन्त्रालय अन्तर्गतके इपिडिमियोलोजी तथा रोग नियन्त्रण महाशाखा (इडीसीडी)से भर्खर करल एक अध्ययनसे तीन हप्तासम संक्रमण बढटी जैना, ओकरपाछे उच्च विन्दुमे कुछ समय स्थिर रहना ओ भदौके अन्तिम सातासे केल संक्रमण घटटी जैना डेखल बा । चौठो लहरमे दैनिक आठ हजार जानेसम संक्रमित हुई सेक्ना इडीसीडीके अनुमान बा ।

आजकाल्ह दैनिक संक्रमित संख्या एक÷एक हजारसे कम बा । ‘अइना तीन हप्तासम अभिन बह्रटी जैना ओ दैनिक दुईसे आठ हजारसम नयाँ संक्रमित थपे सेक्ना आंकलन करल बा, स्वास्थ्य मन्त्रालयके एक उच्च अधिकारी कहलै, ‘संक्रमण मध्यमविन्दुमे पुगल बा । कुछ दिनमे उच्चविन्दुमे पुग्बी ।’

उहाँक अनुसार संक्रमण तीन हप्तापाछे केल टरे झरटी जैना आंकलन करल बा । ‘मनै खोप नइलगाइल वा जनस्वास्थ्यके मापदण्ड पालना नइकरल अवस्थामे संक्रमणदर बढ्न हो । आबके एक महिना कठिन हुई सेकी, उ अधिकारी कहलै, ‘हम्रे अब्बेक संक्रमणदरके चक्रहे आंकलन करल हुुई । मने, यी तथ्यांक तरे उप्परफे हुई सेकठ ।’

स्वास्थ्य मन्त्रालयके सहप्रवक्ता डा. समीरकुमार अधिकारीफे आबके दुई हप्तामे कोरोना संक्रमण उत्कर्षमे पुगे सेक्ना आंकलन करल बटैलै । ‘आबके दुई हप्ता कोरोना संक्रमण उच्च विन्दुमे पुग्न ओ ओकरपाछे घटटी जैना हमार अनुमान हो,’ डा. अधिकारी कहलै ।

अधिकांश मनै खोप लगाइल कारण अस्पताल भर्नादर अन्य लहरसे भर कम हुइना स्वास्थ्य मन्त्रालयके आंकलन बा । मने संक्रमितके संख्या बढ्टी जाके अस्पताल भर्ना दरफे बढे सेक्ना सहप्रवक्ता अधिकारी बटैठै । ‘संक्रमित हुइल कुछ हप्तापाछे केल मनै अस्पतालमे पुगठै । आबके दुई हप्तापाछे मृत्युदर बढ्न आंकलन करल बा, उहाँ कहलै ।

कोरोना विरुद्ध खोप लगाइल ६ महिनापाछे शरीरमे क्रमशः एन्टीबडी कम हुइटी जिहीसे शरीरमे कोरोना संक्रमणके जोखिम फेर बढटी गैल संक्रामक रोग विशेषज्ञ डा. अनुप बास्तोला बटैठै । जोखिमहे कम कैना ‘बुस्टर डोज’के अनिवार्य रुपमे डेहे पर्ना उहाँक कहाई बा । मन्त्रालयके पछिल्का विवरण अनुसार ७३ लाख ५१ हजार ६९५ जाने केल बुस्टर डोज लगैले बटै ।

‘खोपके पूर्ण मात्रा लगासेकल ६ महिनापाछे शरीरमे एन्टीबडी कम हुइटी जाइठ । एन्टीबडीहे बढाइक लाग दुसर खोपहे बुस्टर डोजके रुपमे लगाई परठ,’ डा. बास्तोला कहलै, ‘अब्बे बुस्टर डोज लगैना संख्या कम बा । टबमारे तत्काल कभरेज बढाई परठ ।’

अस्पतालमे संक्रमित बढटी

चौठा लहर सुरु हुइलसंगे कोरोनाके जटिल खालके बिरामी बढे लागल बटै । उपचारमे संलग्न चिकित्सकके अनुसार जटिल खालके बिरामी बढनामे तीन ठो कारण बटै ।

पहिल, भाइरस एकदम संक्रामक बा कलेसे यिहीसे दीर्घरोगी ढेर प्रभावित हुइल बटै । दुसरा, संक्रमित ढिला करके अस्पताल पुगल बटै ओ टिसरा कतिपय संक्रमित खोप नइलगैले हुइट ।

संक्रमितके नयाँ लक्षण पसिना ढेर अइना

दीर्घरोगीबाहेक संक्रमितके अस्पताल बसाइ विगतके तुलनामे कम हुइल चिकित्सक बटैठै । ‘विगतमे भर्ना हुइल संक्रमितहे कम्तीमे आठ–दश दिनसम अस्पतालमे धारे परे मने, अब्बे दीर्घरोगीबाहेक अन्य संक्रमित चार–पाँच दिनमे डिस्चार्ज हुइल बटै, पाटन अस्पतालके डा. शर्मा कहलै ।

ढेर जैसिन संक्रमितमे घेँचा बठैना, खोकी लग्ना, छाती बठैना, जुरी अइना, जिउ बठैना, कमजोरीपन जैसिन पुराने लक्षण डेखल बा । पछिल्का समय संक्रमितहे पसिना ढेर अइना लक्षण फे डेखल बा ।

पहिल कोरोना संक्रमण हुसेकल मनै अथवा खोप लगासेकल व्यक्तिमे कम असर डेखल बा । खोप नइलगाइल अथवा पूरा मात्रा नइलगाइलहुकनहे यी भेरियन्टके ढेर संक्रमण डेखल ओ ओइने अस्पताल भर्ना हुइना अवस्थामे रहल डा. शर्मा बटैठै ।

‘डेल्टा भेरियन्टमे फोक्सामे सिधा संक्रमण करके ढेर मात्रामे अक्सिजन डेहे परल रहे । मने, अब्बे संक्रमितके उप्परके छातीमे असर, रुघाखोकी तथा पसिना ढेर अइना जैसिन समस्या डेखल बा’ डा. शर्मा कहलै ।