थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १३ कुँवार २६४६, बिफे ]
[ वि.सं १३ आश्विन २०७९, बिहीबार ]
[ 29 Sep 2022, Thursday ]

फोनिजके २३ औं स्थापना दिवस मनागिल

पहुरा | २७ श्रावण २०७९, शुक्रबार
फोनिजके २३ औं स्थापना दिवस मनागिल

पहुरा समाचारदाता
धनगढी, २७ सावन ।
नेपाल आदिवासी जनजाती पत्रकार महासंघके २३ औं स्थापना दिवस शुकके रोज धनगढीमे मनागिल बा ।

महासंघके प्रदेश समिति ओ जिल्ला समितिके संयूक्त आयोजनामे मनागिल कार्यक्रममे अइना निर्वाचनमे थारु पत्रकारके भूमिकाबारे छलफल हुइल रहे ।

कार्यक्रमके वडका पहुना रहल नेपाल आदिवासी जनजाती पत्रकार महासंघके केन्द्रीय सदस्य तथा प्रदेश संयोजक भीम चौधरी यिहे अगहन ४ गते हुइना प्रदेश ओ प्रतिनिधि सभा चुनावमे थारु पत्रकारहुकनके अहम भूमिका रहल बटैलै । उहाँ कहलै, ‘यिहीसे पहिले थारु समुदायके प्रतिनिधित्व करल जनप्रतिनिधिहुकन जिटाइक लाग थारु पत्रकारके भारी डेन रहल । ओइन विजय हुके गैलपाछे थारु समाजके लाग कैसिन योगदान रहल अब्बे समिक्षा कैना दिन आइल बा ।’

सुदूरपश्चिम प्रदेशसभा सदस्य तथा पूर्व राज्यमन्त्री चुनकुमारी चौधरी थारु पत्रकार ओ थारु जनप्रतिनिधिविच समन्वय आवश्यक रहल बटैली । थरुहट नेता लक्ष्मण थारु आबसे विश्लेषनात्मक समाचारफे लिखेपर्ना बटैलै ।

कार्यक्रममे नेपाल आदिवासी जनजाती महासंघ सुदूरपश्चिम प्रदेश समन्वय समितिके अध्यक्ष दलबहादुर घर्तीमगर, थारु पत्रकार संघके केन्द्रीय उपाध्यक्ष प्रेम चौधरी, रानाथारु समाजके केन्द्रीय उपाध्यक्ष कमलसिंह राना, प्रेस सेन्टरके केन्द्रंीय सदस्य मुकेश टेर्रा, थारु लेखक इन्दु चौधरी, रानाथारु डटकमके सम्पादक नन्दलाल राना, तारानगर गाउँक भल्मन्सा गोठुराम चौधरी, थारु नागरिक समाजके सदस्य बसन्ती चौधरीलगायत मन्तव्य व्यक्त करले रहिट ।

नेपाल आदिवासी जनजाती पत्रकार महासंघ प्रदेश अध्यक्ष रामलखन चौधरीके अध्यक्षतामे हुइल कार्यक्रममे स्वागत जिल्ला अध्यक्ष राम दहित ओ संचालन महासचिव उन्नती चौधरी करले रहिट ।

जनाअवजको टिप्पणीहरू