हरेरी महोत्सव सुरु

‘कला, संस्कृतिके संरक्षण हुई नइसेकल हो’

पहुरा समाचारदाता
धनगढी, २८ सावन । धनगढी उमहानगरपालिकाके नगर उप प्रमुख कन्दकला राना थारु समुदायके कला, संस्कृतिके संरक्षण हुई नइसेकल बटैले बटी ।

परम्परासंगे कला, संस्कृति जोगाइल धनगढी उपमहानगरपालिका–५ जाँई गाउँमे शनिच्चरके रोजसे सुरु हुइल हरेरी महोत्सवके उदघाटन कार्यक्रममे उहाँ उ बाट बटवाइल हुइट । उहाँ कहली, ’यहाँके थारु समुदायके कला ओ संस्कृतिसे भरल एकदम धनी रहल मने कला संस्कृति संरक्षण हुई नइसेकल हो । थारु समुदायके परम्परागत रुपसे मनैटी आइल गुरही, रानाथारुसे मनाइल तिजमे स्थानीय सरकार सार्वजनिक विदा डेहल रहे । स्थानीय सरकार ढिला हुइलेसेफे थारु समुदायके चाडपर्वके सम्बोधन कैना सुरु करले बा ।’

नगर उपप्रमुख राना यहाँके महिला डिडीबहिनीयाहुकनके उद्यमी बनैना बटैले बटी । उहाँ कहली, थारु समुदायके डिडीबहिनीयासे बनाइल कला, ढकिया, डेलुवा, लेङगा और समुदायसे बनाइ नइसेकठ । यि थारु डिडीबहिनीयासे बनाई सेकठ ।’ यकर संरक्षण करेक लाग नगरपालिकासे कार्यक्रम बनाइल ओ भदौ कुवाँरसे सुरु हुईना उहाँ बटैली ।

आदिवासी जनजाती थारु किसान डेंगु मलेरियासंगे लरके बैठना यहाँके खोला नाला बन जंगल, बाघ भालु संरक्षण यहाँके आदिवासी जनजाती थारु किसान डाडु भैया हुइट ।

थारु समुदायके बडघर भल्मन्सा लैङिक हिंसा अन्त्य करेक लाग ओ मिलाइक लाग जौन परम्परा रुपमे मिलैटी आइल बा । उहाँहुकनहे कानूनी सहायता लेके गाउँघरके समस्या समाधान करे सेक्नाफे न्यायिक समितिके संयोजक समेट रहल राना कहली । उहाँ भल्मन्साहुकनहे तालिमकेफे व्यवस्था करल बटैली । थारु समुदायके डेउथान ओ रानाथारुके भुइहार यकर संरक्षण आवश्यक बा । जाँइक गाउँक अधुरो भवन पुरा कैना स्थानीय सरकारके सहयोगफे अवश्य रही, प्रदेश ओ संघीय सरकारसेफे पहल कैना उहाँ प्रतिवद्धता व्यक्त करली ।

किसान डाडु भैयाके बहुट समस्यामे बटै,’ उहाँ कहली, ‘हम्रे उहाँहुकनके मुद्दा उठान करलेसेफे समस्या समाधन करे नइसेक्गिल हो । किसान डाडु भैया समयमे विउ, मलखाद नइपैले हुइट । किसानके समस्या अभिन जस्टेक टस्ते बा । सिचाईके समस्या बा । पानी नइबरसठ, पानीमोटरहे विद्युतके पावर नइधानठ ।’ किसानके सिचाई सुविधाके लाग कृषि मिटरके व्यवस्था कैना नीतिमे नानसेकल ओरसे हाली सुविधा हुइना उहाँ बटैली ।

विकास कहटी किल सडक खानेपानी विजुलीवत्ती केल नइहो । विकास कहलेक संस्कृतिके विकास आवश्यक बा । मानव स्वास्थ्यफे रहेपरना उहाँ बटैली । नगरपालिकासे हरेक महिना वडा क्लिनिकसे निःशुल्क स्वास्थ्य सेवा डेटी आइलफे उहाँ बटैली ।

कार्यक्रममे धनगढी उपमहानगरपालिका–५के वडा सदस्य दात्तुराम पाण्डे, गौरीशंकर मन्दिर व्यवस्थापन समितिके अध्यक्ष घनश्याम ऐर, नेपाल घरेलु तथा साना उद्योग महासंघके कैलालीके अध्यक्ष धनबहादुर चौधरी मन्तव्य व्यक्त करले रहिट । हरेरी महोत्सव २०७९ मुल आयोजक समितिके संयोजक तथा जाँईक भल्मन्सा कुलविर चौधरीके अध्यक्षतामे हुइल महोत्सव उदघाटन कार्यक्रममे वडका पहुना रहल धनगढी उमहानगरपालिकाके नगर उप प्रमुख कन्दकला राना थारु मन्डरा बजाके उदघाटन करले रहिट । कार्यक्रममे स्वागत डेउमति चौधरी ओ संचालन सविता चौधरी÷विनय चौधरी करले रहिट ।

ओस्टेक करके थारु समुदायके गायक मनिराम करियामघरिया, राजु चौधरी, विक्रम चौधरी लगायतके वेजोड प्रस्तुती हुइल रहे । ओेस्टेक सखिया नाँच,आधुनिक डाँन्स प्रस्तुत कैगिल बा ।