थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १३ कुँवार २६४६, बिफे ]
[ वि.सं १३ आश्विन २०७९, बिहीबार ]
[ 29 Sep 2022, Thursday ]

नेपाल समाजवादी पार्टीके प्रदेश समिति पुनःगठन

पहुरा | ३१ श्रावण २०७९, मंगलवार
नेपाल समाजवादी पार्टीके प्रदेश समिति पुनःगठन

पहुरा समाचारदाता
धनगढी, ३१ सावन ।
नेपाल समाजवादी पार्टीसे प्रदेश समिति पुनःगठन करले बा । मंगरके रोज धनगढीमे प्रदेश भेलासे ९९ सदस्यीय प्रदेश समिति गठन हुइल बा । प्रदेश समितिके अध्यक्ष मिनराज बडु रहल बटै ।

पार्टीके प्रदेश उपाध्यक्षमे हरिप्रसाद तिमिल्सीना, बिनोद चन्द, सिता नागरी, दिनेश बिष्ट चयन हुइल बटै । ओस्टेक मुख्य सचिवमे राजाराम चौधरी, सचिवमे डम्मर पाण्डे, गगन बिक, कोषाध्यक्षमे सुरेन्द्र यादव सहित ९९ सदस्यीय प्रदेश कमिटि चयन करल प्रदेश अध्यक्ष मिन राज बडु जानकारी डेलै ।

प्रदेश कमिटि गठन संगे जिल्ला भेलाहे तिब्रता डेना बडु बटैलै । ‘हम्रे अब अपन पार्टीहे बिस्तार कैना, जिल्ला भेला कैनासे लेके आम जनताके मुद्धा बोक्के आघे बह्रबी बडु कहलै ‘यहाँ प्रदेश सरकार कहाँ बा खोजे पर्ना बेला आइल बा । कहु भ्रस्टाचार हुइल बा कलेसे प्रदेशके बजेट हो कना सुनजाइठ मजा काममे प्रदेशके उपस्थिती शुन्य बा यैसिन प्रदेश सरकारके भ्रस्टाचारी कदमके हम्रे भण्डाफोर कैबी गलत कामके तथ्य लेके जनताहे डेखैबी ।’ प्रदेश केल नइहुके स्थानीय तहमेफे भ्रस्टाचार ओ बेथिती ढेर रहल उहाँक कहाई बा । ‘हम्रे सक्कु क्षेत्रमे पुग्बी ओ बेथिति अन्त्य कैना अभियानमे जनताहुकनसंग रहबी ।’

भेला सम्पन्न हुइलपाछे पत्रकार सम्मेलनमे बोल्टी नेपाल समाजवादी पार्टीके कार्यकारिणी सदस्य तथा सुदूरपश्चिम ईन्चार्ज डा. जनकराज शाह पार्टी विधिसम्मत तरिकासे नइचललपाछे पुनर्गठन करे परल बटैलै । पार्टीमे सुशासन कायम नहुइइलपाछे नेपाल समाजवादी पार्टी पुनर्गठन करे परल उहाँ बटैलै । देशभरीमे अपन पार्टीके मजा उपस्थिति हुइल कारण अइना चुनावमे मजा उपस्थिति हुइना उहाँ बटैलै । जनता समाजवादी पार्टीसे अलग हुइलपाछे बाबुराम भट्टराई तथा महेन्द्र राय यादव नेतृत्वमे नेपाल समाजवादी पार्टी केन्द्रमे गठन हुइल रहे ।

जनाअवजको टिप्पणीहरू