अबसिक चुनाउमे नागरिक उन्मुक्तिसे एमाले लगायत गठबन्धनहेफे चुनौती
पहुरा समाचारदाता
धनगढी, १ भदाै । कैलाली जिल्लामे स्थानीय तहके निर्वाचनमे मजा पकड जमाइलपाछे अब्बे प्रदेश ओ संघीय चुनावमे नागरिक उन्मुक्ति पार्टी पुराना राजनीतिक दलहुकनहे चुनौती बनल बा ।
टीकापुर घटनामे मुछल निलम्बित सांसद रेशमलाल चौधरीके नेतृत्वमे गठित उ दल कैलालीहे अपन पकड क्षेत्र बनैले बा । स्थानीय तह निर्वाचनमे कैलाली जिल्लामे नेपाली काँग्रेस, माओवादी केन्द्र, नेकपा एमालेलगायत भारी दलहे पराजित करटी अपन प्रभाव डेखासेकल बा ।
सरकारसे संघ ओ प्रदेशके निर्वाचनके मिति घोषणा करलसंगे भारी दल सुदूरपश्चिम प्रदेशके राजधानीसमेत रहल कैलालीमे नागरिक उन्मुक्ति पार्टीके चुनौती सामना कैना आन्तरिक तयारी करटी रहल बटै । उहे क्रममे प्रमुख दल अपन जातीय मोर्चाहे सक्रिय बनाई लागल बटै ।
थारु बाहुल्य कैलाली जिल्लामे माओवादी केन्द्रसे थारु मुक्ति मोर्चाहे आघे सरले बा । मोर्चाके भर्खर कञ्चनपुर जिल्लाके सिंहपुरमे आयोजित सुदूरपश्चिम प्रदेश सम्मेलनमे फे कैलाली जिल्लामे नागरिक उन्मुक्ति पार्टी मुख्य चुनौती बने सेक्ना स्वीकार करल बा ।
नेपाली काँग्रेस निकट थारु नेता चुनावके मुखमे आके टीकापुर घटनामे मुछलहुकनके मुद्दा फिर्ता तथा रेशम चौधरीके रिहाइ नइकरलेसे अपनेहुक्रनके राजनीतिक करियर समाप्त हुइना कहटी प्रधानमन्त्री शेरबहादुर देउवाहे दबाब डेटी आइल बटै ।
कैलाली क्षेत्र नम्बर ३ के उम्मेदवार आकांक्षी रामजनम चौधरीके नेतृत्वमे थारू नेता बारबार बालुवाटार पुगल बटै ।
थारू नेताहुकनके दबाबपाछे प्रधानमन्त्री देउवा टीकापुर घटनाके विषयमे आवश्यक प्रक्रिया आघे बहै्रना गृहमन्त्रीहे निर्देशन डेहल बटाइल बा । उहे अनुसार गैल शुकके सरकारके ओरसे गृहमन्त्री बालकृष्ण खाण नेतृत्वके टोली ओ थारू कल्याणकारिणी सभाके पदाधिकारीबीच छलफल हुइल रहे ।
सभाके ओरसे छलफलमे सहभागी कैलालीके प्रभात चौधरी वार्ता सकारात्मक हुइल सुनैलै । नागरिक उन्मुक्ति पार्टी कैलाली जिल्लाके १३ स्थानीय तहमन्से ४ पालिका प्रमुख जित्टी भारी दलके रुपमे स्थापित हुइल बा । उ पार्टी संघ ओ प्रदेशसभा निर्वाचनके लाग कैलाली ओ बर्दिया जिल्लामे अपन सक्कु शक्ति परिचालन करटी रहल बा ।
नागरिक उन्मुक्ति पार्टीके केन्द्रीय सदस्य गंगा चौधरी फे कैलालीके १, २, ३ मे पार्टीके प्रभाव और दलके तुलनामे बहुट मजा रहल दाबी करलै । बर्दिया जिल्लाके क्षेत्र नं १ ओ २ मेफे निर्वाचनके तयारी पूरा हुइल उहाँक कहाई बा । थारु बाहुल्य जिल्ला केल नइहुके पहाडी जिल्लामेफे संगठन विस्तार आघे बढाइल केन्द्रीय सदस्य चौधरी बटैलै ।
फाइल फाेटु