थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १३ कुँवार २६४६, बिफे ]
[ वि.सं १३ आश्विन २०७९, बिहीबार ]
[ 29 Sep 2022, Thursday ]
‘ कटैनी पुल निर्माण सुरु ’

स्थानीयसे पक्की पुलके माग

पहुरा | १ भाद्र २०७९, बुधबार
स्थानीयसे पक्की पुलके माग

पहुरा समाचारदाता
धनगढी, १ भदौ ।
बाढसे भत्काइल कटैनीके काठे पुल निर्माण सुरु हुइल बा । कैलारी गाउँपालिका–७, रामपुरस्थित कटैनी लडियाके काठे पुल बाढसे भत्काइल डेढ महिना पाछे पुल निर्माण हुइ लागल हो । गैल असार ९ गते आइल बाढसे उ पुल भत्काइल हो ।

गाउँपालिकाके आर्थिक सहयोग तथा भुँइयाफाँटा, रामपुर ओ तिघरीके स्थानीयहुक्रनके जनश्रमदानसे पुल निर्माण हुइटी रहल रामपुरके भलमन्सा रामलाल चौधरी जानकारी डेलै ।

‘पुल बिग्रल महिनौं हुइल रहे, मने गाउँपालिकाके आर्थिक सहयोग ओ कुछ गाउँक स्थानीयनहुक्रनके जनश्रमदान मार्फत पुल बनैटी रहल बाटी’, उहाँ कहलै ।

पुल भत्काइलपाछे यहाँका स्थानीयहे ढिउर समस्या हुइल वडा नम्बर ७ के वडा अध्यक्ष दीपेन्द्र बम बटैलै ।‘भुईयाफाँटा, रामपुर, तिघरीके खेट्वामे जैना मुख्य कृषि सडकके पुल हो’, उहाँ कहलै । ‘बाढसे पुल पुहाइलपाछे जनताहुक्रे आपन खेट्वामे जैना पवेराके डगरा नेंगना बाध्य बाटै ।’

रामपुर स्थित कटैनी लडियामे बन्ना पुल कृषि सडकहे जोर्ना हुइल ओरसे उ ठाउँमे पक्की पुलके लाग विशेष पहल कैटी रहल वडा अध्यक्ष बम बटैलै । ओस्टके वडा अध्यक्ष बम रामपुर स्थित काठे पुल ओ छटकपुर बसन्ता स्थित काठे पुल मर्मतके लाग गाउँपालिकासे डेढ÷डेढ लाख रकम विनियोजन हुइल जानकारी डेलै ।

बाढसे महत्वपूर्ण कृषि सडकके काठे पुल भत्काइलपाछे स्थानीयवासीहे ओहोरदोहोर कैना ढिउर समस्या हुइल बा । पुल बाढसे भत्काके पुहाइलपाछे कुछ दिन यहोर भुईयाँफाँटा, रामपुर, तिघरी गाउँके किसान जोखिम मोलके ओहोरदोहोर कैना बाध्य हुइल बाटै ।

खेतीपातीके समयमे पुल बिग्रलपाछे स्थानीयहे ओहोरदोहोर कैना समस्या हुइल बा । पुल भत्कलपाछे स्थानीयहुक्रे ट्रयाक्टर, डल्लप लगायतके कृषि साधन लेके खेट्वासम अइना जैनाके लाग वडा नम्बर ५ स्थित पवेरा मन्दी हुइटी तीन÷चार घण्टाके यात्रा करे परल बा ।

कुछ दिन आघे उहे वडाके छटकपुर बसन्तास्थित कटैनी लडियाके काठे पुलहे बाढ पुहैले रहे ।

यहोर स्थानीयहुक्रे कटैनी लडियामे पक्की पुलके माग कैले बाटै । उहाँहुक्रे लडियामे बरवार बाढ अइटी किल कटैनी लठियाके ठाउँ ठाउँमे रहल काठे पुल पुहाके लैजिना ओ स्थानीयहे आवात जावतमे समस्या हुइना कहटी पक्की पुलके माग करल हुइट ।

वडा नम्बर ७ रतपुरके स्थानीय दीपक चौधरी रामपुर ओ भुँइयाँफाँटा स्थित कृषि सडक जोर्ना कटैनी लडियामे पक्की पुल बनाइ पर्ना जोड डेले बाटै । उहाँ सामाजिक सञ्जाल फेसबुकमे लिख्टी कहले बाटै–‘हम्रे वडा नम्बर ७ के विशेष रामपुर ओ भुँईयाँफाँटाके बासिन्दा बर्षौसे भोग्टी आइल समस्या हो । फेनसे बाढ आइ, पुहालैजाइ । आब दीर्घकालीन उपाय पक्की पुल बने परल अध्यक्ष ज्यू । कुछ समयके लाग काठे पुल फेन ठिके बा ।’

जनाअवजको टिप्पणीहरू