बाढ प्रभावित परिवारहे खाद्य सहयोग
पहुरा समाचारदाता
हसुलिया, १३ कुवाँर । कैलारी गाउँपालिकाके बाढसे प्रभावित परिवारहे खाद्य सामाग्री सहयोग कैगिल बा ।
गाउँपालिका उपाध्यक्ष भगवतीकुमारी चौधरीके प्रमुख आतिथ्यमे बाढसे प्रभावित १०० घरधुरीहे परिवारहुकनहे खाद्य सामाग्री हस्तान्तरण कैगिल हो । यिहे गैल कुवाँर १ गते आइल बाढसे कैलारीके टमस्थित वडाके करिब आठ सय घरधुरी बाढसे प्रभावित हुइल बटै ।
कैलारी गाउँपालिकाके समन्वय ओ केयर नेपालके सहयोगमे मानवीय साझेदारी मञ्चसे वडा नम्बर ५ के बाढ प्रभावित परिवारहे खाद्य सामग्री वितरण कैगिल गाउँपालिका अध्यक्ष राजसमझ चौधरीके स्वकीय सचिव जितेन्द्र चौधरी जनैलै ।
बाढसे प्रभावित परिवारहे खाद्य सामाग्री सहयोग वडा नम्बर ५ के अध्यक्ष विष्णु प्रसाद चौधरी, वडा सदस्य, निडस नेपालके बिनोद कडारा, पुष्पराज उपाध्याय ओ इलाका प्रहरी कार्यालय हसुलियाके प्रमुख रामसिहं बोहरा लगायतसे हस्तान्तरण कैगिल बा ।
