थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २४ माघ २६४६, मंगर ]
[ वि.सं २४ माघ २०७९, मंगलवार ]
[ 07 Feb 2023, Tuesday ]

धनगढीमे तनाव, प्रहरीसे ३७ सेल अश्रुग्याँस प्रहार

पहुरा | १६ मंसिर २०७९, शुक्रबार
धनगढीमे तनाव, प्रहरीसे ३७ सेल अश्रुग्याँस प्रहार

पहुरा समाचारदाता
धनगढी, १६ अगहन ।
निषेधाज्ञाके बीच विद्यार्थी प्रदर्शन करलबाद धनगढी तनावग्रस्त बनल बा । अपन सहपाठीके हत्या करल दोषीहे कारवाही ओ उचित क्षतिपूर्तिके माग करटि पञ्चोदय माध्यमिक विद्यालयके विद्यार्थी आन्दोलनमे उत्रल बटैं ।

उहाँहुकनके आन्दोलन उग्र रुप लेहेलागल ओरसे स्थिति नियन्त्रण करेक लाग प्रहरी ३७ सेल अश्रुग्याँस प्रहार करल जनैले बा । ओस्टेक, कुछ विद्यार्थीहुकनहे प्रहरी धडपकड फेन करल भिडियो सामाजिक सञ्जालमे आइल बा । प्रहरी प्रदर्शनमे रहल कुछ विद्यार्थीहे नियन्त्रणमे समेत लेले बा ।

बिफेक रोड निर्माण करटिरहल कालिका कन्स्ट्रक्सनके ग्रेडरसे डबके पञ्चोदयके कक्षा ८ मे अध्ययनरत १५ वर्षीया छात्रा चेतना साउँदके घटनास्थलमे ज्यान गिल रहे । ग्रेडरके ठक्करसे सामान्य घाहिल छात्राहे चालक ग्रेडर ब्याक कैके हत्या करल विद्यालय परिवार ठहर करले बा ।

विद्यालय व्यवस्थापन समिति फेन छात्राके हत्या करल प्रेस विज्ञप्ति जारी कैके उल्लेख करले बा । साथे, दोषीउप्पर कडा कारवाहीके माग करले बा । स्थानीय प्रशासन धनगढीमे बिफेक रातसे निषेधाज्ञा जारी करले बा ।

मानवअधिकार संरक्षण मञ्चके ध्यानाकर्षण

पञ्चोदय माध्यमिक विद्यालयके कक्षा–८ मे अध्ययनरत छात्रा चेतना साउँदके ग्रेडर दुर्घटनामे हुइल मृत्युुके घटना ओ सिर्जित परिस्थितिप्रति मानबअधिकार संरक्षण मञ्च नेपाल सुदूरपश्चिम प्रदेश समितिसे ध्यानाकर्षण हुइल जनागिल बा ।

मञ्चके प्रदेश अध्यक्ष डिल्लीराज जोशी एक प्रेस विज्ञप्ति जारी करटि घटनाप्रति दुल्ख व्यक्त करटि मृत छात्राके आत्माके चिरशान्तिके कामना तथा परिवारजनमे समवेदनासहित दोषीउपर कडा कानूनी कारवाही ओ पीडितहे न्यायसहित क्षतिपूर्तिके माग करले बटैं ।

विज्ञप्तिमे घटनासे सिर्जित परिस्थितिके कारण धनगढीके बालबालिका क्षेत्र अशान्तमय हुइल स्थितिमे घटनाहे थप दुखान्त ओ प्रभावित हुइनासे रोक्ना, आक्रोश ओ उत्तेजना नैहोके संयमता अपनैना ओ बालबालिकाउप्पर दमन ओ बल प्रयोग नैकरनासमेत अपिल करल बा । विज्ञप्तिमे समस्या समाधानमे तत्काल उचित पहल करना सक्कु स्थानीय प्रहरी प्रशासन, राजनैतिक दल, नागरिक समाज, सञ्चारकर्मी, शिक्षक, विद्यार्थी सबहे अनुरोध करल बा ।

जनाअवजको टिप्पणीहरू