अपाङता रहल व्यक्तिनहे बंगुरके बच्चा ओ किराना सामान वितरण
पहुरा समाचारदाता
हसुलिया, १७ अगहन । कैलालीके कैलारी गाउँपालिका वडा नम्बर १ मे अपाङता रहल व्यक्तिहुकन बंगुरके बच्चा ओ किराना सामान वितरण कैगिल बा ।
कैलारी गाउँपालिकाके समन्वयमे थारु समावेशी संघके आयोजना तथा एविलाइजके आर्थिक सहयोगमे अपाङता रहल व्यक्तिहुकनहे जिविकोपार्जनमे सहयोग मिले कना उद्देश्यसे बंगुरके बच्चा ओ किराना पसलके सामान वितरण कैगिल हो ।
कैलारी गाउँपालिकाके उपाध्यक्ष भगवतीकुमारी चौधरीके प्रमुख आतिथ्यमे हुइल कार्यक्रमे उहाँ अपाङता रहल व्यक्तिहुकनहे बंगुरके बच्चा ओ किराना पसलके सामान हस्तान्तरण करल रहिट ।
कार्यक्रममे बोल्टी अपाङता रहल व्यक्तिफे अवसर पैलेसे सपाङ मनै जैसिक काम करके डेखाई सेक्ना बटैली । उहाँ कहली, ‘नेपालके संविधानमे सक्कु जनहनके हकअधिकार सुनिश्चित करले बा, जे जैसिन काम करे सेक्ठ ओकर लाग ओस्टे मेरके कामके व्यवस्था करलेसे सब जाने अपनही जिविकोपार्जन करे सेक्ठै ।’ अपाङता रहल मनैन हेला नइकरके सम्मान व्यवहार करे पर्ना फे उपाध्यक्ष बटैली ।
ओस्टेक करके कार्यक्रमके विशिष्ट अतिथि कैलारी गाउँपालिका वडा नम्बर १ वडा अध्यक्ष धोजहरिपाल बोहराफे अपाङता रहल व्यक्तिहुकनहे बंगुरके बच्चा ओ किराना पसलके सामान हस्तान्तरण करल रहिट ।
अपाङता सर्वाड्डिन विकास सेवा समाज नेपालके अध्यक्ष रितादेवी चौधरीके अध्यक्षतामे हुइल कार्यक्रममे पहुना वडा सदस्य तुल्सी चौधरी, रानामुडाके भल्मन्सा टेकलाल चौधरीलगायत सहभागिता रहे । कार्यक्रममे ९ जनहनमे किराना पसलके सामान, ¥याग, काउन्टरर ओ ७ जनहनके बंगुरके बच्चा, सरसफाईके सामान वितरण कैगिल गाउँपालिका उपाध्यक्षके स्वकीय सचिव कृष्ण चौधरी जानकारी डेलै ।
