प्रधानमन्त्री देउवासे उद्घाटन हुइना

पहुरा समाचारदाता
धनगढी, २० अगहन । सुदूरपश्चिम महोत्सवके तयारी अन्तिम चरणमे पुगल बा । इहे अगहन २२ गतेसे आयोजना हुइना महोत्सवके तयारी अन्तिम चरणमे पुगल हो । मंगरके पत्रकार सम्मेलन मार्फत कैलाली उद्योग वाणिज्य संघके अध्यक्ष पुष्पराज कुँवर महोत्सवके तयारी ९० प्रतिशत पुरा हुइल जानकारी डेलै ।

‘महोत्सवके तयारी ९० प्रतिशत पुरा होसेकल बा, २१ गते बुधसम सक्कु तयारी पुरा हुजाइ।’ उहाँ कहलै ।

महोत्सव आयोजनाके लाग दुई करोड खर्च हुइटी रहल बटैटी उहाँ महोत्सवसे व्यवसायीहुक्रे ५ से ७ करोडके कारोबार कैना बटैलै । सुदूरपश्चिम महोत्सव सबके लाग टिहुवार जस्टे रहल ओरसे सक्कु जाने मिके सम्पन्न कैना उहाँ आग्रह करलै ।

उहे अवसरमे अध्यक्ष कुँवर महोत्सवके उद्घाटन प्रधानमन्त्री शेर बहादुर देउवासे हुइना समेत जानकारी करैलै ।
महोत्सव उद्घाटनके लाग कैलाली उद्योग वाणिज्य संघके टोलीसे प्रधानमन्त्री देउवाहे भेटके निमन्त्रणा फेन डेहल अध्यक्ष कुँवर जानकारी डेलै ।

‘दिगो विकासके लाग आर्थिक सम्वृद्धि’ मुल नारासहित आयोजना हुइना महोत्सवमे चर्चित लोक तथा दोहोरी गायक अइना उहाँ बटैलै । ओहकान अनुसार महोत्सव अवधिभर नै स्थानीय कलाकार, थारु, राना थारु ओ पहाडी समुदायके कलासंस्कृति झल्कना नाच गान, खानपिन, स्कुलके बालबालिकाहुक्रनके प्रतिभाहे प्रोत्सहान कैना प्रतियोगिता जैसिन कार्यक्रमहे प्राथमिकता डेना जनाइल बा ।

धनगढी उपमहानगरपालिका वडा नम्बर १ के पशुपति टोलमे आयोजना हुइना जनाइल बा । महोत्सवमे व्यापारिक स्टल रमाईलो मेला सांस्कृतिक कार्यक्रक लगायत स्थानीय कला संस्कृति ओ पहिचानके प्रर्वद्धन तथा संरक्षणके लाग २०६३ से महोत्सव आयोजना हुइटी आइल बा ।

महोत्सवमे सर्वसाधारणके लाग १०० रुपैयाँ टिकट ओ विद्यार्थीनके आइडि कार्ड मार्फत ५० प्रतिशत छुट डेना आयोजक जनैले बा ।