सातौं राष्ट्रिय थारु साहित्य सम्मेलन बाँकेमे हुइना

पहुरा समाचारदाता
धनगढी, १० पुस । सातौं राष्ट्रिय थारु साहित्य सम्मेलन बाँकेके राप्ती सोनारी गाउँपालिका वडा नम्बर ६ सिद्धन्वामे हुइना हुइल बा । थारु गोचाली समाज फत्तेपुर बाँकेके आयोजनामे माघ २०, २१ ओ २२ गते राष्ट्रिय थारु सम्मेलन हुइना हुइल हो ।

थारु लेखक संघ नेपाल हरेक साल फरक फरक जिल्लामे आयोजना करटी आइल राष्ट्रिय सम्मेलन सम्बन्धित जिल्लाके थारु समुदायसंग सम्बन्धित संस्था, क्लव तथा समुहहे स्थानीय स्तरमे आयोजक तथा व्यवस्थापनके जिम्मा डेले बा । इ साल बाँकेमे राष्ट्रिय सम्मेलन हुइना हुइलक ओर्से बाँकेके थारु युवा उत्साहित हुइल बटैं ।

सम्मेलनके लाग आयोजक थारु गोचाली समाज फत्तेपुर टमान चरणमे तयारी बैठक कैले बा । थारु गोचाली समाजके अध्यक्ष देखलाल थारुके अध्यक्षतामे शनिच्चरके रोज बैठल बैठकसे राष्ट्रिय थारु साहित्य सम्मेलन आयोनाके दिनपाट टोक्के सम्मेलन भव्यताके साथ सफल पारक लाग टमान समिति गठन कैके जिम्मा डेगैल बा ।

थारु लेखकसंघके सदस्य शेखर दहितके संयोजकत्वमे प्रस्तावना तयारी समिति, गोविन्द दहित चौधरीके संयोजकत्वमे व्यवस्थापन समिति, सोमनाथ थारुके संयोजकत्वमे स्वागत सत्कार समिति, कालुराम थारुके संयोजकत्वमे समन्वय तथा सहकार्य समिति, सुन्दरलाल थारुके संयोजकत्वमे आर्थिक संकलन समिति, सुनिता थारुके संयोजकत्वमे साँस्कृतिक समिति गठन कैके जिम्मा बाँटगैल बा ।

तयारीमे जुटल थारु गोचाली समाजकके महासचिव कालुराम थारु जानकारी डेलैं । सम्मेलनमे मेचीसे महाकालीसमके थारु साहित्यकार ओ थारु कला संस्कृतिहे महत्व डेहुइया व्यत्तित्व ओइनके सहभागिता रना जंग्रार साहित्यिक बखेरीके केन्द्रीय अध्यक्ष सोम डेमनडौरा जानकारी डेलैं ।

सम्मेलनमे टमान विधाके साहित्य वाचन संगे जिल्ला ओ स्थानीय स्तरके मुद्दाहे विशेष प्राथमिकता फेके व्यापक बहस ओ छलफल कैना उहाँ बटैलैं । सातौं राष्ट्रिय थारु साहित्य सम्मेलनमे बाँके जिल्ला ओ राप्ती सोनारीके मुख्य समस्या ओ समाधानके उपाय, शिक्षाके अवस्था, बरघर ओइनके मुद्दा लगायतके विषय उठान करे सेक्ना गर्न बखेरीके अध्यक्ष डेमनडौरा सुझाव डेलैं ।

तयारी बैठकमे थारु लेखक संघ नेपालके सदस्य शेखर दहित, बालिका चौधरी, सममेलनके संयोजक लक्ष्मी चौधरी, सहसंयोजक श्रीदेवी थारु लगायत स्थानीय युवा ओइनके सहभागिता हुइल रहे ।

इहिसे पहिले दांग, कैलाली, बर्दिया, रुपन्देही, सुर्खेत ओ कंचनपुरमे राष्ट्रिय थारु साहित्य सम्मेलन होसेकल बा ।